فیصل آباد ۔ 13 اگست (اے پی پی):جشنِ آزادی اور معرکہ حق تقریبات کے سلسلے میں باغِ جناح فیصل آباد میں گرینڈ لیزر لائٹ شو کا شاندار انعقاد کیا گیا ،جس میں قومی پرچم کے رنگ، تاریخی لمحات اور معرکہ حق کی جدوجہد کو روشنیوں اور ملی نغموں کے حسین امتزاج کے ساتھ پیش کیا گیا۔ لیزرشو نے شرکاء کو مسحور کر دیا اور شہری بڑی تعداد میں اہلِ خانہ کے ہمراہ اس دلکش تقریب سے محظوظ ہوئے۔ خواتین اور بچوں نے بھی اس منفرد لیزر ڈسپلے سے بھرپور لطف اٹھایا جبکہ شہریوں نے مناظر کو اپنے کیمروں میں محفوظ کیا۔تقریب میں میجر جنرل ابوبکر شہباز (جی او سی) گوجرانوالہ، ریجنل پولیس آفیسر ذیشان اصغر، ڈپٹی کمشنر کیپٹن (ر) ندیم ناصر نے خصوصی شرکت کی۔ ریجنل پولیس آفیسر ذیشان اصغر نے کہا کہ نفرتوں کو ختم کرکے محبتوں کو بانٹنا ہوگا، افواجِ پاکستان پوری طرح دشمن کو زیر کرنے کی صلاحیت رکھتی ہے۔
انہوں نے طلبہ پر زور دیا کہ ملکی ترقی کے لیے اپنی تعلیم پر بھرپور توجہ دیں اور تنقید، تردید اور اعتراض سے نکل کر ایمانداری سے اپنا کام کریں۔ ذیشان اصغر نے مزید کہا کہ پاک فوج نے بھارت کو دھول چٹا کر پوری قوم کا سر فخر سے بلند کر دیا اور پوری دنیا کو بتا دیا کہ پاک فوج ہمیشہ پاکستان کی بقاء کے لیے تیار ہے۔ڈپٹی کمشنر کیپٹن (ر) ندیم ناصر نے کہا کہ پاکستان کی سالمیت اور ترقی کے لیے ہم ہمیشہ تیار ہیں، جشنِ آزادی معرکہ حق قومی یکجہتی کا پیغام ہے، چھوٹے چھوٹے تحفظات بھلا کر ملک کی بہتری کا سوچنا ہوگا، پاکستان ہمیشہ زندہ باد ہے اور ہمیں اس کے لیے مثبت سوچ اپنانی چاہیے۔ انہوں نے شرکاء سے کہا کہ ایک دوسرے سے وعدہ کریں کہ بہتر پاکستانی بنیں گے۔شرکاء نے جشنِ آزادی کی شاندار تقریبات پر ضلعی انتظامیہ کو خراجِ تحسین پیش کرتے ہوئے کہا کہ گرینڈ لیزر لائٹ شو نے جشنِ آزادی کو یادگار بنا دیا۔