ایل ڈبلیو ایم سی کا کمرشل مارکیٹس، سروس لینز، یو ٹرنز اور مرکزی شاہراہوں پر خصوصی صفائی آپریشن ،ڈور ٹو ڈور ویسٹ کولیکشن کا عمل بھی جاری

لاہور۔25اگست (اے پی پی):لاہور شہر بھر میں تمام کمرشل مارکیٹس، شاہراہوں، یو ٹرنز اور سروس لینز پر ایل ڈبلیو ایم سی کا عملہ تعینات ہے۔ سی ای او بابر صاحب دین کی ہدایت پر فیروز پور روڈ، جیل روڈ، شادمان مارکیٹ، لکشمی چوک، گلبرگ، برکت مارکیٹ، بیڈن روڈ اور ٹیمپل روڈ سمیت دیگر اہم تجارتی مراکز اور شاہراہوں پر مینوئل سویپنگ اور ویسٹ کلیئرنس آپریشن مکمل کیا گیا۔ انہوں نے کہا کہ دوران بارش بھی صفائی ٹیمیں نکاسی آب کے لیے متحرک رہیں۔

سی ای او کا کہنا ہے کہ صاف ستھرا لاہور ہی ہماری اولین ترجیح ہے اس مقصد کے حصول کیلئے تمام افسران و ورکرز تینوں شفٹوں میں متحرک ہیں۔ تمام ٹاون منیجرز کو ہدایت جاری کر دی گئی ہے کہ اپنے اپنے ٹاونز میں 100فیصد ڈور ٹو ڈور ویسٹ کولیکشن کو یقینی بنائیں۔ شہریوں سے بھی گزارش ہے کہ کوڑا کرکٹ گھر کے باہر نہ پھینکیں،ایل ڈبلیو ایم سی ورکرز کے ساتھ تعاون کریں۔صفائی سے متعلق شکایات کیلئے ہیلپ لائن 1139پر رابطہ کریں یا سوشل میڈیا کا استعمال کریں۔