یونیسکو نے کامسٹیک کو سیسیمی میں مبصر کا درجہ دے دیا

اسلام آباد۔2نومبر (اے پی پی):اقوامِ متحدہ کی تعلیمی، سائنسی و ثقافتی تنظیم (یونیسکو) نے باضابطہ طور پر اسلامی تعاون تنظیم (او آئی سی) کی ذیلی سائنسی و تکنیکی تعاون کی قائمہ کمیٹی ,کامسٹیک کو بین الاقوامی مرکز برائے سنکروٹرون لائٹ برائے سائنسی تجربات و اطلاقات برائے مشرقِ وسطیٰ سیسیمی میں مبصر کا درجہ دے دیا ہے۔یونیسکو کے دفترِ بین الاقوامی معیارات و قانونی امور سے جاری ایک سرکاری مراسلے میں، جو پروفیسر ڈاکٹر محمد اقبال چوہدری، کوآرڈینیٹر جنرل او آئی سی-کامسٹیک کے نام ارسال کیا گیا، یہ تصدیق کی گئی کہ کامسٹیک کی جانب سے ارسال کردہ خط موصول ہو گیا ہے، اور سیسیمی میں کامسٹیک کا مبصر درجہ 26 ستمبر 2025 سے مؤثر ہو گیا ہے۔

اس پیش رفت پر اپنے خیالات کا اظہار کرتے ہوئے پروفیسر ڈاکٹر محمد اقبال چوہدری نے کہا کہ ہمیں سیسیمی میں مبصر کے طور پر شمولیت پر فخر ہے، یہ سنگِ میل کامسٹیک کے اُس مستقل عزم کی عکاسی کرتا ہے جو وہ اسلامی تعاون تنظیم کے رکن ممالک کے مابین سائنسی تعاون کو مضبوط بنانے اور اعلیٰ تحقیقی سرگرمیوں کو فروغ دینے کے لیے رکھتا ہے،سیسیمی ایک ایسا منفرد تعاون کا ماڈل ہے جو جغرافیائی حدود سے ماورا ہو کر سائنس، ٹیکنالوجی اور اختراع کے ذریعے اقوام کو جوڑتا ہے۔

کامسٹیک کا سیسیمی کے ساتھ اشتراک، مشترکہ تحقیق، استعداد کار میں اضافے، اور اسلامی دنیا کے سائنسدانوں کے لیے جدید سائنسی سہولیات تک رسائی کے نئے دروازے کھولے گا۔انہوں نے مزید کہا کہ کامسٹیک، بطور او آئی سی کی وزارتی قائمہ کمیٹی برائے سائنس و ٹیکنالوجی، علم، اختراع، اور پائیدار ترقی کو فروغ دینے والی بین الاقوامی شراکتوں کے قیام کے لیے پرعزم ہے، جو کہ اسلامی تعاون تنظیم کے مقاصد کے عین مطابق ہیں۔