وفاقی وزیر قومی غذائی تحفظ و تحقیق رانا تنویر حسین سے ایف اے او کے وفد کی ملاقات، پاکستان کے زرعی شعبے کو درپیش اہم مسائل پر تبادلہ خیال

اسلام آباد۔24نومبر (اے پی پی):وفاقی وزیر برائے قومی غذائی تحفظ و تحقیق رانا تنویر حسین سے ایف اے او (خوراک اور زراعت کی تنظیم) کے وفد نے ڈائریکٹر لینڈ اینڈ واٹر ڈویژن لفینگ لی کی قیادت میں ملاقات کی۔ ملاقات میں پاکستان کے زرعی شعبے کو درپیش اہم مسائل پر تبادلہ خیال کیا گیا جن میں آبی وسائل کی فراہمی، پانی کے معیار کے مسائل اور بیجوں سے متعلق مشکلات شامل ہیں۔

وزارت قومی غذائی تحفظ و تحقیق سے جاری اعلامیہ کے مطابق وفاقی وزیر رانا تنویر حسین نے ملاقات کے آغاز پر ملک میں پانی کی سطح میں کمی پر گہری تشویش کا اظہار کیا۔ انہوں نے کہا کہ اس رجحان کا اثر پینے کے پانی کی فراہمی اور زرعی آبپاشی پر پڑ رہا ہے۔

وفاقی وزیر نے پانی کی کمی کو فوری طور پر حل کرنے کی ضرورت پر زور دیا جو پاکستان کی زرعی پیداواریت کو براہ راست متاثر کر رہا ہے۔ انہوں نے کہا کہ بڑے پیمانے پر تعمیراتی منصوبوں نے زرخیز زرعی زمین پر منفی اثرات مرتب کیے ہیں جس سے ملک کی غذائی پیداوار کی صلاحیت مزید کم ہو رہی ہے۔

رانا تنویر حسین نے ایف اے او سے درخواست کی کہ پاکستان میں چاول کی پیداوار بڑھانے کے لیے مدد فراہم کی جائے جو کہ ملک کی ایک اہم فصل ہے۔ انہوں نے ایف اے او سے درخواست کی کہ زرعی شعبے کو بحال کرنے کے لیے اہم منصوبوں کا آغاز کیا جائے اور خاص طور پر ان چیلنجز کے پیش نظر جو موسمیاتی تبدیلیوں کی وجہ سے بڑھ رہے ہیں۔ انہوں نے کہا کہ یہ منصوبے پاکستان کے غذائی تحفظ کے لیے ضروری ہیں کیونکہ ملک موسمیاتی تبدیلیوں کے اثرات کی وجہ سے مختلف چیلنجز کا سامنا کر رہا ہے۔

وفاقی وزیر نے پاکستان کے زرعی شعبے کی ڈیجیٹلائزیشن کی اہمیت پر بھی زور دیا اور کہا کہ اس سے پیداواریت، کارکردگی اور پائیداری کو بہتر بنایا جا سکتا ہے۔ انہوں نے ایف اے او سے درخواست کی کہ جدید ٹیکنالوجیز اور ڈیجیٹل ٹولز کے نفاذ میں مدد فراہم کی جائے تاکہ زرعی عمل کو بہتر بنایا جا سکے۔ ٹیکنالوجی کے ذریعے پاکستان اپنے پانی اور زمین کے وسائل کا بہتر انتظام کر سکے گا جس سے زرعی عمل کو زیادہ پائیدار بنایا جا سکے گا۔

پانی کے معیار اور بیجوں کے مسائل پر گفتگو کرتے ہوئے وفاقی وزیر نے کہا کہ پانی کے معیار میں کمی اور بیجوں کی ترقی میں مشکلات کا سامنا ہے۔ انہوں نے ایف اے او سے درخواست کی کہ مشترکہ طور پر ایسے حل تیار تلاش کئے جائیں جو پانی کے معیار کو بہتر بنائیں اور بیجوں کی موسمیاتی تبدیلیوں کے اثرات کے خلاف مزاحمت کو بھی بڑھائیں تاکہ پاکستان کے کسانوں کو مستقبل کے چیلنجز کا مقابلہ کرنے کے لیے بہتر طور پر تیار کیا جا سکے۔

علاوہ ازیں رانا تنویر حسین نے پانی کے وسائل کے انتظام کی حکمت عملیوں کو مزید مستحکم کرنے کی ضرورت پر زور دیتے ہوئے کہا کہ زراعت میں پانی کے موثر استعمال کو یقینی بنانے اور موسمیاتی تبدیلی کے اثرات کو کم کرنے کے لیے پائیدار طریقوں کی ضرورت ہے۔ وفاقی وزیر نے ایف اے او سے درخواست کی کہ پانی کے جدید انتظام کی ٹیکنالوجیز جیسا کہ پریسیشن آبپاشی کے نظام کو اپنانے میں پاکستان کی مدد کی جائے تاکہ پانی کی کمی کے بڑھتے ہوئے مسائل کا مقابلہ کیا جا سکے۔

وفاقی وزیر رانا تنویر حسین نے کہا کہ مستقبل میں ایف اے او کے تعاون سے چلنے والے منصوبوں میں ایک متوازن نقطہ نظر اپنانا ضروری ہے۔ انہوں نے تجویز پیش کی کہ ایف اے او منصوبوں کی ڈیزائننگ کے ابتدائی مرحلے سے ہی قومی اداروں کے ساتھ مل کر کام کرے تاکہ مقامی ملکیت اور طویل مدتی پائیداری کو یقینی بنایا جا سکے۔ انہوں نے کہا کہ ایف اے او اور قومی اداروں کا مشترکہ طور پر منصوبوں پر عملدرآمد کرنے سے پاکستان کے تحقیق اور توسیع کے نظام کو مضبوط بنایا جا سکے گا، ادارہ جاتی صلاحیت میں اضافہ ہو گا اور پاکستان ان منصوبوں کو مزید توسیع دے سکے گا۔

ملاقات کے دوران لفینگ لی ڈائریکٹر ایف اے او کے لینڈ اینڈ واٹر ڈویژن نے وفاقی وزیر کے خدشات کو تسلیم کرتے ہوئے ایف اے او کی جانب سے پاکستان کو زرعی اور آبی مسائل سے نمٹنے میں مدد دینے کے عزم کا اظہار کیا۔ انہوں نے یقین دہانی کرائی کہ ایف اے او پانی کے وسائل کے انتظام، زرعی تحقیق اور موسمیاتی تبدیلی سے ہم آہنگ زراعت کے طریقوں کو اپنانے میں پاکستان کی مدد جاری رکھے گا۔ لفینگ لی نے یہ بھی کہا کہ ایف اے او پاکستان کو تکنیکی نظام تیار کرنے میں مدد دے گا جیسے ریموٹ سینسنگ، جی آئی ایس اور موسمیاتی ماڈلنگ وغیرہ تاکہ پانی اور زمین کے وسائل کا بہتر انتظام کیا جا سکے۔

لفینگ لی نے پاکستان کی ادارہ جاتی صلاحیت کو مزید مستحکم کرنے کی ضرورت پر بھی زور دیا تاکہ پاکستان خود مختار طور پر موسمیاتی تبدیلی سے ہم آہنگ منصوبے ڈیزائن اور نافذ کر سکے۔ انہوں نے کہا کہ ایف اے او پاکستان کے قومی اداروں کو بین الاقوامی موسمیاتی مالیات کو محفوظ بنانے اور ان پر عملدرآمد کرنے کی صلاحیت فراہم کرنے کے لیے تیار ہے تاکہ پاکستان مستقبل میں اپنے ترقیاتی منصوبوں کی قیادت کر سکے۔

ملاقات کے اختتام پر فریقین نے پانی کے وسائل کے انتظام، بیجوں کی ترقی اور پریسیشن زراعت کی ٹیکنالوجیز پر مشترکہ منصوبوں پر بات چیت جاری رکھنے پر بھی اتفاق کیا۔ فریقین نے طویل مدتی پائیدار ترقی کے لیے مشترکہ عزم کا اظہار کیا جس میں موسمیاتی تبدیلی سے ہم آہنگی اور ادارہ جاتی صلاحیت کی تعمیر پر زور دیا گیا۔

ملاقات کے آخر میں وفاقی وزیر رانا تنویر حسین نے ایک مرتبہ پھر کہا کہ ایف اے او کے مستقبل کے تعاون میں پاکستان کے قومی اداروں کی صلاحیتوں کو مضبوط بنانا اولین ترجیح ہونی چاہیے تاکہ پاکستان خود مختار طور پر بین الاقوامی موسمیاتی مالیات حاصل کر سکے اور ان منصوبوں پر عملدرآمد کر سکے۔

انہوں نے کہا کہ مستقبل میں ایک متوازن تعاون ماڈل اپنانا ضروری ہے جہاں قومی ادارے اہم منصوبوں میں قیادت کریں اور ایف اے او تکنیکی مشورہ اور معاونت فراہم کرے۔فریقین نے اس بات پر اتفاق کیا کہ ایک متوازن تعاون ماڈل پاکستان اور ایف اے او دونوں کے لیے فائدہ مند ہو گا اور یہ آئندہ منصوبوں کو زیادہ موثر، پائیدار اور پاکستان کی قومی ترقی کی ترجیحات کے مطابق بنانے میں بھی مدد فراہم کرے گا۔