ایس ای سی پی کی جانب سے ابتدائی چھ ماہ میں 21 ہزار سے زائد کمپنیوں کا اندراج معاشی اعتماد کی علامت

اسلام آباد۔6جنوری (اے پی پی):سکیورٹیز اینڈ ایکسچینج کمیشن آف پاکستان (ایس ای سی پی)کے تازہ ترین اندراج کے اعداد و شمار سے سامنے آیا ہے کہ ملک کے کاروباری ماحول میں مسلسل مضبوط رفتار دیکھی جا رہی ہے جو سرمایہ کاروں کے بڑھتے ہوئے اعتماد اور معیشت کے مثبت امکانات کو ظاہر کرتی ہے۔منگل کے روز سکیورٹی ایکسچینج کمیشن آف پاکستان کی جانب سے جاری بیان کے مطابق موجودہ مالی سال کے پہلے چھ ماہ کے دوران ایس ای سی پی نے 21,668 نئی کمپنیاں رجسٹر کیں۔

ان کمپنیوں نے 30.7 ارب روپے کے ادا شدہ سرمایہ میں حصہ ڈالا جو گزشتہ سال اسی مدت میں رجسٹر ہونے والی 16,839 کمپنیوں کے مقابلے میں 29 فیصد اضافہ ہے۔ اب کل رجسٹر شدہ کمپنیوں کی تعداد 279,724 ہے۔متعدد شعبوں میں مسلسل ترقی دیکھی گئی۔ سب سے زیادہ نئی کمپنیاں آئی ٹی اور ای-کامرس میں رجسٹر ہوئیں (4,277 کمپنیاں)، اس کے بعد ٹریڈنگ (2,997)، سروسز (2,686)، اور رئیل اسٹیٹ (2,031) ہیں۔

یہ ظاہر کرتا ہے کہ کاروباری سرگرمیاں خاص طور پر ٹیکنالوجی اور سروسز کے شعبوں میں بڑھ رہی ہیں۔غیر ملکی سرمایہ کاروں کی دلچسپی بھی مضبوط رہی۔ اس عرصے کے دوران 524 نئی رجسٹرڈ کمپنیوں نے 1.26 ارب روپے کے غیر ملکی سرمایہ کاری حاصل کی جس میں 731 غیر ملکی سرمایہ کاروں نے حصہ لیا۔ سرمایہ کاری کے لحاظ سے چین سب سے آگے رہا اور کل سرمایہ کاری کا 71 فیصد حصہ دیا۔ اس کے بعد افغانستان (8 فیصد)، امریکہ (2 فیصد) اور برطانیہ، جرمنی، جنوبی افریقہ، جنوبی کوریا، ناروے، ویتنام، نائجیریا اور بنگلہ دیش نے ہر ایک 1 فیصد حصہ ڈالا۔ باقی 11 فیصد سرمایہ کاری دیگر ممالک سے آئی۔