نائب وزیر اعظم محمد اسحاق ڈار کی ایس سی او کے 25ویں یومِ تاسیس کے موقع پر ایس سی او خاندان کو دلی مبارکباد

اسلام آباد۔15جون (اے پی پی):نائب وزیر اعظم و وزیر خارجہ سینیٹر محمد اسحاق ڈار نے شنگھائی تعاون تنظیم (ایس سی او) کے 25ویں یومِ تاسیس کے موقع پر ایس سی او خاندان کو دلی مبارکباد پیش کی ہے۔ انہوں نے کہا کہ 2001 میں اپنے قیام کے بعد سے ایس سی او علاقائی تعاون کے ایک اہم پلیٹ فارم کے طور پر ابھری ہے۔ یہ تنظیم اپنے رکن ممالک کے درمیان علاقائی امن، سلامتی، استحکام، اقتصادی تعاون، باہمی روابط اور عوامی سطح پر تبادلوں کے فروغ میں اہم کردار ادا کر رہی ہے۔

دفتر خارجہ سے جاری بیان کے مطابق سینیٹر محمد اسحاق ڈار نے کہا کہ 25ویں سالگرہ کا یہ سنگِ میل ’’شنگھائی سپرٹ‘‘ کی پائیدار قوت کی تصدیق کرتا ہے جو باہمی اعتماد، مساوات، ثقافتی تنوع کے احترام، مشترکہ ترقی اور تعمیری روابط کے اصولوں کے ذریعے ہماری رہنمائی کرتا آ رہا ہے۔ایس سی او میں پاکستان کا سفر، مبصر کی حیثیت سے لے کر 2017 میں مکمل اور فعال رکن بننے تک، کثیرالجہتی تعاون کے لئے ہماری غیر متزلزل وابستگی اور اپنے خطے کی صلاحیتوں پر ہمارے اعتماد کا مظہر ہے۔ پاکستان ایس سی او چارٹر کے اصولوں اور مقاصد سے مکمل وابستگی رکھتا ہے۔

ہم بین الاقوامی قانون کے احترام اور حسنِ ہمسائیگی کے فروغ کے حوالے سے ایس سی او کے مؤقف کو سراہتے ہیں۔انہوں نے کہاکہ ہم رواں سال ستمبر میں ایس سی او کونسل آف ہیڈز آف سٹیٹس (سی ایچ ایس ) کی سربراہی سنبھالنے اور 2027 میں تنظیم کے سربراہی اجلاس کی میزبانی کے منتظر ہیں۔ یہ علاقائی اور عالمی سطح پر پاکستان کے قائدانہ کردار پر اعتماد کا اظہار ہے۔ پاکستان اقتصادی تعاون کے فروغ، علاقائی روابط کے استحکام اور عوام کے درمیان باہمی مفاہمت کو مزید گہرا کرنے کے لئے مستقبل بین اور عملی اقدامات پر مبنی ایجنڈے کو آگے بڑھاتا رہے گا۔

پاکستان نے ایس سی او کے کام میں بھرپور اور قابلِ فخر کردار ادا کیا ہے۔ اکتوبر 2024 میں اسلام آباد میں کونسل آف ہیڈز آف گورنمنٹ (سی ایچ جی ) کے اجلاس کی میزبانی کی گئی۔ اس وقت پاکستان 2025-2026 کے لئے ایس سی او کے علاقائی انسدادِ دہشت گردی ڈھانچے (SCO-RATS) کی سربراہی بھی کر رہا ہے۔ غربت کے خاتمے سے متعلق ایس سی او کے خصوصی ورکنگ گروپ کے مستقل چیئرمین کی حیثیت سے ہمارا مقصد خطے کے کروڑوں لوگوں کے معیارِ زندگی کو بہتر بنانا ہے۔

پاکستان کا سٹریٹجک جغرافیائی محلِ وقوع یوریشیائی روابط کے لئے ایک قدرتی پل کی حیثیت رکھتا ہے۔ چین پاکستان اقتصادی راہداری (سی پیک) ایس سی او ممالک کے درمیان بین العلاقائی اقتصادی اور تجارتی انضمام کی ایک کامیاب مثال ہے،ہم علاقائی امن اور استحکام کے فروغ میں ایس سی او کے کردار کو قدر کی نگاہ سے دیکھتے ہیں۔ دہشت گردی کے خلاف جنگ میں بے مثال قربانیاں دینے والے ایک صفِ اول کے ملک کی حیثیت سے پاکستان دہشت گردی، علیحدگی پسندی اور انتہاپسندی جیسی ’’تین برائیوں‘‘ کے خلاف ایس سی او کے مشترکہ اور تعاون پر مبنی فریم ورک کو انتہائی اہمیت دیتا ہے۔سلامتی کے علاوہ اقتصادی ترقی کے لئے تنظیم کی کوششیں ایک مضبوط اور پائیدار علاقائی معیشت کی بنیاد رکھ رہی ہیں۔

ڈیجیٹل جدت، توانائی کے تحفظ سے متعلق منصوبوں اور قومی کرنسیوں میں باہمی ادائیگیوں کے فروغ کے لئے ایس سی او کی کاوشیں قابلِ تحسین ہیں۔ پاکستان علاقائی روابط، تجارت و سرمایہ کاری، غذائی تحفظ، موسمیاتی استحکام، عوامی صحت، تعلیم، ڈیجیٹل جدت اور پائیدار ترقی کے شعبوں میں اپنا فعال کردار ادا کرنے کے لئے پُرعزم ہے،ہم ایک ایسے خوشحال مستقبل کا تصور رکھتے ہیں جو سماجی ہم آہنگی اور باہمی احترام کی بنیاد پر استوار ہو۔ آئیے مل کر اپنے خطے کو امن، ہم آہنگی اور مشترکہ خوشحالی کا مرکز بنائیں تاکہ آنے والی نسلوں کے لئے ایک بہتر مستقبل یقینی بنایا جا سکے۔