شہید ذوالفقار علی بھٹو انسٹیٹیوٹ آف سائنس اینڈ ٹیکنالوجی کے طلباء کی جانب سے شجرکاری مہم کامیابی سے مکمل

لاڑکانہ۔ 05 اکتوبر (اے پی پی):شہید ذوالفقار علی بھٹو انسٹیٹیوٹ آف سائنس اینڈ ٹیکنالوجی (SZABIST) یونیورسٹی لاڑکانہ کیمپس کے طلبہ کی جانب سے کمیونٹی سروس پروجیکٹ کے تحت لاڑکانہ شہر اور گردونواح میں بڑے پیمانے پر شجرکاری مہم کامیابی سے مکمل کی گئی، جس کے دوران مختلف مقامات پر مجموعی طور پر 3000 پودے لگائے گئے۔شجرکاری مہم میں خاص طور پر مقامی اور ماحول سے مطابقت رکھنے والے درختوں اور پودوں کو ترجیح دی گئی تاکہ وہ لاڑکانہ کی موسمی صورتحال، زمینی ماحول اور مقامی حیاتیاتی تنوع کے لیے زیادہ فائدہ مند ثابت ہوں۔ مہم کے دوران نیم، بیر، سرسوں، کیکر، شیشم، ببول، کھجور اور دیگر مقامی اقسام کے پودے لگائے گئے۔طلبہ کا کہنا تھا کہ شجرکاری کا مقصد صرف شہر کو سرسبز بنانا نہیں بلکہ ماحول کے تحفظ، سایہ، حیاتیاتی تنوع اور ماحولیاتی استحکام کو فروغ دینا بھی ہے۔ طلبہ نے پارکس، سکولوں، رہائشی کالونیوں، دیہات، آرٹس کونسل لاڑکانہ اور یونیورسٹی کیمپس سمیت مختلف مقامات پر پودے لگائے جبکہ مقامی افراد، سکولوں اور کمیونٹی کے نمائندوں نے بھی شجرکاری مہم میں بھرپور حصہ لیا۔مہم کے دوران طلبہ نے شہریوں میں درختوں کی اہمیت، ماحولیاتی آلودگی میں کمی، درجہ حرارت میں اعتدال،

قدرتی وسائل کے تحفظ، مقامی حیاتیاتی تنوع اور آنے والی نسلوں کے لیے صاف و صحت مند ماحول کی ضرورت کے حوالے سے بھی شعور اجاگر کیا۔شجرکاری مہم اقوام متحدہ کے پائیدار ترقی کے اہداف (SDGs) سے بھی ہم آہنگ ہے بالخصوص SDG-13 موسمیاتی تبدیلی کے خلاف اقدامات (Climate Action) اور SDG-15 زمین پر زندگی (Life on Land) کے اہداف سے اس کا براہِ راست تعلق ہے۔SZABIST یونیورسٹی لاڑکانہ کیمپس کی انتظامیہ نے طلبہ، فیکلٹی، کمیونٹی اور دیگر معاونین کی کاوشوں کو سراہتے ہوئے کہا کہ کمیونٹی سروس پروجیکٹ طلبہ کو اپنی علمی و عملی صلاحیتوں کو معاشرے کی خدمت اور ماحول کے تحفظ سے جوڑنے کا بہترین موقع فراہم کرتا ہے۔انتظامیہ کے مطابق شجرکاری مہم کا ایک اہم مقصد لگائے گئے پودوں کی باقاعدہ دیکھ بھال، پانی کی فراہمی اور حفاظت کو یقینی بنانا بھی ہے تاکہ یہ شجرکاری مہم محض ایک سرگرمی تک محدود نہ رہے بلکہ طویل مدت میں لاڑکانہ کے ماحول کو سرسبز اور بہتر بنانے میں موثر کردار ادا کرے۔