سیالکوٹ ، تجاوزات کے خلاف آپریشن میں تھڑے اور شیڈز ختم کر دئیے گئے

سیالکوٹ۔ 07 اکتوبر (اے پی پی):ڈپٹی کمشنر سیالکوٹ اویس مشتاق کی ہدایت پر روڈس روڈ اور کشمیر روڈ پر تجاوزات کے خلاف آپریشن کیا گیا۔ آپریشن انچارج پیرا فورس سیالکوٹ ناصر محمود ججہ اور اسسٹنٹ کمشنر سیالکوٹ صفدر شبیر کی نگرانی میں پیرا فورس اور میونسپل کارپوریشن سیالکوٹ کی مشترکہ ٹیم نے کارروائی کی۔کارروائی کے دوران دکانوں کے سامنے غیر قانونی طور پر قائم کئے گئے تھڑے، بڑے شیڈز اور دیگر تجاوزات کو ہٹا دیا گیا جبکہ تجاوزات کے قیام کے لئے استعمال ہونے والا سامان بھی ضبط کر لیا گیا۔

دکانوں کے باہر قائم غیر قانونی ڈھانچوں اور رکاوٹوں کا خاتمہ کرتے ہوئے تجاوزات سے کلیئر کروا دیا گیا۔ڈپٹی کمشنر اویس مشتاق نے کہا ہے کہ سرکاری جگہ، فٹ پاتھ یا سڑک پر تھڑے، شیڈز اور سامان رکھ کر تجاوزات قائم کرنے سے گریز کیا جائے۔ انہوں نے کہا کہ خلاف ورزی کی صورت میں قانون کے مطابق کارروائی عمل میں لائی جائے گی۔ڈپٹی کمشنر نے کہا کہ پیرس فورس اور میونسپل کارپوریشن کو واضع ہدایات جاری کی گئی ہیں کہ تجاوزات کے خلاف زیرو ٹالیرنس کی پالیسی پر عملدرآمد کیا جائے۔