کراچی ۔3جنوری (اے پی پی):وفاقی وزیر برائے انفارمیشن ٹیکنالوجی و ٹیلی کمیونیکیشن سید امین الحق نے کہا ہے کہ 2020 میں ملک کی آئی ٹی ایکسپورٹس میں 44 فیصد کا اضافہ ہوا ہے ، آئی ٹی کی ایکسپورٹس مزید بڑھانے کے لئے اقدامات کررہے ہیں ، ڈیجیٹل پاکستان ویژن کے تحت ملک بھر خصوصا دیہی علاقوں میں براڈبینڈ رابطے کو یقینی بنانے کے لئے ہر ممکن کوشش کی ہے ، وزارت انفارمیشن ٹیکنالوجی آئی ٹی کے شعبہ سے متعلق ٹیکس کے مسائل کے حل کے لئے کوشاں ہے ۔ ان خیالات کا اظہار انہوں نے اتوار کو مقامی ہوٹل میں فوربس ایشیا بیسٹ انڈر بلین 2020 کا ایوارڈ جیتنے والی کمپنی سسٹمز لمیٹڈ کے اعزاز میں منعقدہ تقریب سے خطاب کرتے ہوئے کیا ۔ وفاقی وزیر سید امین الحق نے مزید کہا کہ دسمبر 2022 تک ملک میں 5Gبراڈ بینڈ کو متعارف کرادیا جائے گا ۔ انہوں نے کہا کہ حکومت آئی ٹی گریجویٹس کو روزگار کے مزید مواقع فراہم کرنے کی کوشش کررہی ہیں ۔ انہوں نے کہاکہ وزارت انفارمیشن ٹیکنالوجی میں تمام فیصلے میرٹ پر ہوتے ہیں اور بد عنوانی پر کوئ سمجھوتہ نہیں کیا جاتا ۔ انہوں نے کہا کہ وزارت آئی ٹی سندھ میں آپٹیک فائبر نیٹ ورک منصوبوں سے متعلق کل بروز پیر ایک معاہدہ پر دستخط کرے گی ۔ تقریب سے وزیراعظم ٹاسک فورس برائے انفارمیشن ٹیکنالوجی کی ممبر جہاں آرا ،پاکستان سافٹ وئیر ایکسپورٹ بورڈ کے منیجنگ ڈائریکٹر عثمان ناصر ، سی ای او سسٹمز لمیٹیڈ آصف پیر سمیت دیگر نے بھی خطاب کیا ۔
