فیصل آباد۔ 16 اگست (اے پی پی):نظامت زرعی اطلاعات محکمہ زراعت نے آبپاش علاقوں کے کاشتکاروں کو مکئی کی فصل میں فاسفورس اور پوٹاش کی ساری مقدار ڈالنے کامشورہ دیا ہے ، کاشتکار 30اگست سے قبل مکئی کے کھیتوں میں فاسفور س اور پوٹاش کی مکمل مقدار جبکہ نائٹروجن کا پانچواں حصہ ڈال دیں تاکہ مکئی کی اچھی پیداوار حاصل ہو سکے۔
محکمے کے ترجمان نے کہاکہ موسم برسات کے دوران جڑی بوٹیاں تیزی سے افزائش پاتی ہیں لہٰذا ان کی بروقت تلفی بھی ضروری ہے۔انہوں نے کہاکہ اگرچہ مکئی کی اگیتی اقسام کی کاشت کا موزوں وقت 20 اگست تک ہے، تاہم بارانی علاقوں میں مون سون کی بارشوں کے باعث کاشتکار مکئی کی کاشت 30 اگست تک بھی مکمل کرسکتے ہیں۔
انہوں نے کہاکہ مکئی کی اچھی پیداوارکے لئے ڈرل کاشت کی صورت میں 12 سے13 کلوگرام جبکہ کھیلیوں پر کاشت کی صورت میں 8 سے10کلوگرام اور چارہ کے طور پر استعمال کی صورت میں 40 سے50کلوگرام فی ایکڑ بیج استعمال کیاجاسکتاہے۔
Short Link: https://urdu.app.com.pk/urdu/?p=379973
