راولپنڈی۔29اگست (اے پی پی):آرمی چیف فیلڈ مارشل سید عاصم منیر نے پنجاب کے سیلاب متاثرہ علاقوں میں فوجی جوانوں اور سول انتظامیہ کی مربوط اور انتھک کاوشوں کو سراہا ہے۔انہوں نےیقین دلایاہے کہ سیلاب کے دوران متاثر ہونے والے تمام مذہبی مقامات بشمول دربار صاحب کرتاپور کو ترجیحی بنیادوں پر اصل حالت میں بحال کیا جائے گا۔جمعہ کو آئی ایس پی آر سے جاری کردہ بیان کے مطابق فیلڈ مارشل سید عاصم منیر، نشان امتیاز (ملٹری)، ہلال جرات نے پنجاب کے سیلاب زدہ علاقوں بشمول سیالکوٹ سیکٹر، شکرگڑھ، نارووال اور کرتاپور کا دورہ کیا۔
اس دورے کا مقصد سیلاب کی صورتحال اور جاری ریسکیو و ریلیف سرگرمیوں کا جائزہ لینا تھا۔ چیف آف آرمی سٹاف کو موجودہ صورتحال اور بارشوں کے اگلے مرحلے کے لیے تیاریوں پر جامع بریفنگ دی گئی۔ آرمی چیف نے فوجی جوانوں اور سول انتظامیہ کی مربوط اور انتھک کاوشوں کو سراہا جو متاثرہ علاقوں میں عوام کی جان بچانے اور امداد فراہم کرنے میں مصروف ہیں۔آرمی چیف نے علاقے کی متاثرہ سکھ برادری سے بھی ملاقات کی اور انہیں یقین دلایا کہ سیلاب کے دوران متاثر ہونے والے تمام مذہبی مقامات بشمول دربار صاحب کرتاپور کو ترجیحی بنیادوں پر اصل حالت میں بحال کیا جائے گا۔
انہوں نے اس بات کو دہرایا کہ اقلیتوں اور ان کے مذہبی مقامات کے تحفظ کی ذمہ داری ریاست اور اس کے اداروں کی ہے اور ریاستِ پاکستان اپنی اس ذمہ داری کو نبھانے میں کوئی کسر نہیں چھوڑے گی۔ سکھ برادری نے سیالکوٹ سیکٹر کے سیلاب زدہ علاقوں میں آرمی چیف کی آمد کا پر تپاک استقبال کیا اور آفت کے دوران سول انتظامیہ اور فوج کی جانب سے فراہم کی جانے والی خدمات پر شکریہ ادا کیا۔
چیف آف آرمی سٹاف نے دربار صاحب کرتاپور کا فضائی معائنہ بھی کیا۔سول انتظامیہ کے نمائندوں سے بات چیت کے دوران آرمی چیف نے بروقت ردعمل کی تعریف کی جس کی وجہ سے جانی و مالی نقصان کم ہوا۔جوانوں سے ملاقات کے دوران چیف آف آرمی سٹاف نے ان کے بلند حوصلے، آپریشنل تیاری اور قوم کی خدمت کے جذبے کو سراہا۔ انہوں نے مشکل حالات میں ریسکیو اور ریلیف آپریشنز کے دوران عوام کی خدمت کرنے پر فوجی جوانوں کی خدمات کو خراج تحسین پیش کیا۔ فیلڈ مارشل سید عاصم منیر کی آمد پر کور کمانڈر گوجرانوالہ نے ان کا استقبال کیا۔
