آزادکشمیر میں سپیشل پروٹیکشن یونٹ اور کائونٹر ٹیررزم ڈیپارٹمنٹ کے ادارے قائم کیے جائیں، سکیورٹی اور امن و امان کی صورتحال پر کوئی کمپرومائز نہیں کیا جائے گا، وفاقی وزیر داخلہ رانا ثنا اللہ خان

مظفر آباد ۔14فروری (اے پی پی):وفاقی وزیر داخلہ رانا ثنا اللہ خان نے کہا ہے کہ آزادکشمیر میں سپیشل پروٹیکشن یونٹ اور کائونٹر ٹیررزم ڈیپارٹمنٹ کے ادارے قائم کیے جائیں تاکہ دہشتگردی کے خاتمہ کے لیے فوری طور پر آزادکشمیر پولیس کو تیار کیا جاسکے، ان اداروں کے لئے وفاق فنڈز فراہم کریگا ۔

وہ منگل کو آزاد کشمیر میں انسداد دہشت گردی اور غیر ملکی شہریوں کی سیکورٹی کے حوالے سے اعلیٰ سطحی اجلاس سے خطاب کر رہے تھے ۔ اجلاس میں وفاقی سیکرٹری داخلہ یوسف نسیم کھوکھر، نیشنل کوآرڈینیٹر نیکٹا رائے طاہر، سپیشل سیکرٹری داخلہ آزادکشمیر سردار خالد محمود، کمشنر مظفرآباد مسعود الرحمن اور سیکیورٹی اداروں کے نمائندوں نے شرکت کی ۔

اجلاس میں چیف سیکرٹری آزادکشمیر محمد عثمان چاچڑ اور انسپکٹر جنرل پولیس ڈاکٹر امیر احمد شیخ نے آزادکشمیر کے اندر سکیورٹی صورتحال، مختلف منصوبہ جات میں کام کرنے والے غیر ملکی شہریوں کی تفصیل، آزاد کشمیر میں سپیشل پروٹیکشن یونٹ اور ادارہ انسداد دہشتگردی کے حوالہ سے تفصیلی بریفنگ دی۔

وزیر داخلہ رانا ثنا اللہ خان نے کہا کہ سکیورٹی اور امن و امان کی صورتحال پر کوئی کمپرومائز نہیں کیا جائے گا،تمام منصوبہ جات جن میں غیر ملکی شہری کام کر رہے ہیں، وہ 30 دن کے اندر فول پروف سیکیورٹی انتظامات کو یقینی بنائیں، جاری منصوبہ جات میں ایک فیصد سیکیورٹی کیلئے مختص کرنے کے قانون پر عملدرآمد کیا جائے۔ انہوں نے کہا کہ آزادکشمیر کے اداروں کو مزید فعال بنانے کے لئے ہر ممکن امداد فراہم کریں گے، سیکیورٹی اداروں کی بھرتی میں مقامی افراد کو ترجیح دی جائے گی۔

Short Link: https://urdu.app.com.pk/urdu/?p=351270