فیصل آباد ۔ 27 دسمبر (اے پی پی):اسسٹنٹ ڈائریکٹر محکمہ زراعت توسیع فیصل آباد ڈاکٹر خالد اقبال نے کہا ہے کہ آلو میں شامل پروٹین، کاربوہائیڈریٹ، آئرن اور کیروٹین سمیت دیگر اجزا مختلف بیماریوں کے تدارک اور انسانی صحت کےلئے نہایت مفید ثابت ہوئے ہیں، تاہم اس کا زیادہ استعمال موٹاپےکاباعث بن سکتاہے۔
یہ بات انہوں نے اے پی پی سے گفتگو کے دوران کہی۔انہوں نے کہا کہ آلو میں 22.6 گرام کاربوہائیڈریٹ، 1.6 گرام پروٹین، 7.2 گرام آئرن، 12.3 گرام نیاسین، 1.4 گرام اوبو خلاون، 2.4 گرام کیروٹین، 1.2گرام چربی، 9.7 گرام انرجی، 5.7 گرام نمی،10.4گرام تھیامین ہوتی ہے۔
ان کا کہنا تھا کہ آلو کااستعمال بد ہضمی، پیٹ کی خرابی، اعصابی کھانسی، پھیپھڑوں کی عضلاتی تحریک، بچوں کی نشوونماخصوصاً جب بچے دانت نکال رہے ہوں اس وقت آلو کااستعمال، جلی ہوئی جلد کے علاج کےلئے آلو کا استعمال اور دبلے پن کے خاتمہ کےلئے بھی اس کا استعمال بہترین اثرات کا حامل ثابت ہواہے۔
انہوں نے کہاکہ آلو کی مختلف مصنوعات بھی عوام میں بالعموم جبکہ بچوں میں بالخصوص انتہائی شوق سے استعمال کی جاتی ہیں۔انہوں نے کہاکہ خشک سرد مزاج کی حامل مذکورہ سبزی کو ایک صحتمند شخص کو روزانہ 250 گرام تک غذا کے طور پر استعمال کرناچاہیے۔
Short Link: https://urdu.app.com.pk/urdu/?p=539977
