فیصل آباد۔ 02 جنوری (اے پی پی):کاشتکاروں کو آلو کی بہار یہ فصل جنوری سے لیکر 15 فروری تک کاشت کرنے کی ہدایت کی گئی ہے تاکہ انہیں اپریل کے آخر سے لے کر مئی کے وسط تک بہتر پیداوار حاصل کرنے میں مدد مل سکے۔نظامت زرعی اطلاعات محکمہ زراعت توسیع کے ترجمان نے بتایاکہ آلو سوائے کلراٹھی زمین کے ہر قسم کی زمین میں بآسانی کاشت کیاجاسکتاہے تاہم یہ گہری، نرم، ہوا دار اور اچھی نکاس والی زمین میں بہتر نشو ونما پاکر شاندار فصل دیتاہے۔
انہوں نے کہاکہ اس لحاظ سے آلو کی بہار یہ فصل کی کاشت کیلئے ایسی ذرخیز میرا زمین جس میں نامیاتی مادہ، گوبر اور سبز کھاد کی صورت میں موجو د ہو انتہائی موزوں ہے۔ انہوں نے کہاکہ پنجاب کے میدانی علاقوں میں موسمی تغیرات آلو کی فصل پر اثر انداز ہوتے ہیں۔
انہوں نے کہاکہ آلو کی ڈیزائری، کارڈینل، ڈایامینٹ، فیصل آباد سفید، فیصل آباد سرخ، ایس ایچ 5، پی آر آئی سفید، پی آر آئی سرخ اقسام کاشت کرکے اچھی پیداوار حاصل کی جاسکتی ہے۔ انہوں نے کاشتکاروں کو مزید رہنمائی و مشاورت کیلئے زرعی ماہرین یامحکمہ زراعت کے فیلڈ سٹاف سے رابطہ کی بھی ہدایت کی ہے۔
