اسلام آباد۔18دسمبر (اے پی پی):کل جماعتی حریت کانفرنس آزاد جموں وکشمیر و پاکستان کے کنوینر محمود احمد ساغر نے تحریک آزادی کشمیر کے ممتاز رہنما رئیس الاحرار چوہدری غلام عباس کو ان کی برسی پر شاندار خراج عقیدت پیش کیاہے۔
محمود احمد ساغر نے اسلام آباد میں جاری ایک بیان میں چوہدری غلام عباس کو تحریک آزادی کشمیرکا ایک چمکتا ہواستارہ قراردیتے ہوئے کہا کہ جموں و کشمیر کا پاکستان کے ساتھ الحاق چوہدری غلام عباس کا مشن تھا جس کے لئے انہوں نے اپنی آخری سانس تک جدوجہد کی۔
انہوں نے کہا کہ چوہدری غلام عباس نے اپنی نوجوانی کے دنوں سے برصغیر کے مسلمانوں کی انگریزوں سے باالخصوص کشمیریوں کی ڈوگرہ شاہی کے جبر سے آزادی کے لئے انتھک جدوجہد کی۔ چوہدری غلام عباس نے کشمیر کی تحریک آزادی میں ایک اہم کردار ادا کیااوراپنے اس مشن پر ثابت قدم رہے۔ حریت رہنمائوں نے حق خودارادیت کے حصول تک جدوجہد جاری رکھنے کے کشمیریوں کے عزم کا اعادہ کیا۔
