لاہور۔13مارچ (اے پی پی):محکمہ داخلہ پنجاب نے اسلحہ لائسنس کی ویری فیکیشن کے حوالے سے نادرا کو تمام اسلحہ لائسنسز کی آن لائن ویری فکیشن کیلئے کیو آر کوڈ جاری کرنے کی ہدایت کردی ہے،ترجمان سیکرٹری داخلہ پنجاب کے مطابق کیو آر کوڈ کی مدد سے قانون نافذ کرنے والے ادارے ہر اسلحہ لائسنس کی تصدیق کر سکیں گے۔ سیکرٹری داخلہ پنجاب کی زیرِ صدارت اسلحہ لائسنس ویری فیکیشن کے حوالے سے اہم اجلاس میں سپیشل سیکرٹری داخلہ فضل الرحمان، ایڈیشنل سیکرٹری داخلہ جوڈیشل عمران حسین رانجھا اور نادرا حکام نے شرکت کی ۔
سیکرٹری داخلہ نے اسلحہ لائسنسز کےساتھ کیو آر کوڈ لگانے کیلئے نادرا کو ایک ہفتے کا وقت دیدیا ہے ،نادرا کو تمام اسلحہ لائسنسز متعلقہ شخص کے شناختی کارڈ سے لنک کرنے اور پنجاب بھر کے کمشنرز اور ڈپٹی کمشنرز کو بھی اسلحہ لائسنس سے متعلقہ تمام آرڈرز پر کیو آر کوڈ دینے کی ہدایت کی ہے۔
انہوں نے بتایا کہ اسلحہ لائسنسز کے تصدیقی عمل میں شفافیت سے جعلی لائسنس کی بیخ کنی ہوگی، سنگین جرائم میں ملوث افراد اسلحہ لائسنس کیلئے نااہل ہیں، ترجمان نے بتایا کہ آرمز رولز میں ترامیم کر کے شہریوں کیلئے سہولت پیدا کر رہے ہیں، انفرادی اسلحہ لائسنس اور بزنس آرمز لائسنس رولز کو عام فہم بنا رہے ہیں اسلحہ لائسنس کی ویری فیکیشن کیلئے ڈائریکٹوریٹ آف مانیٹرنگ کا کردار بڑھا رہے ہیں ۔
اسلحہ لائسنس کے حصول اور تجدید کیلئے فیسوں کا شیڈول تبدیل کرنے کی سفارش کی ہے، مینوئل لائسنس کی کمپیوٹرائزیشن کے تمام مراحل کی نگرانی کی جا رہی ہے۔
Short Link: https://urdu.app.com.pk/urdu/?p=571906
