اسلام آباد۔21ستمبر (اے پی پی):نگراں وفاقی وزیر برائے قومی ورثہ و ثقافت جمال شاہ نے اس بات پر اطمینان کا اظہار کیا ہے کہ الیکشن کمیشن آف پاکستان نے جنوری کے آخری ہفتے میں عام انتخابات کا شیڈول دے کر ان کے سابقہ بیانات کی توثیق کی۔ جمعرات کو ایک بیان میں وفاقی وزیر نے اس بات پر زور دیا کہ وہ متعدد ٹی وی انٹرویوز میں مسلسل کہہ چکے ہیں کہ الیکشن کمیشن آف پاکستان فروری سے قبل انتخابات کا اعلان کر دے گا۔
انہوں نے کہا کہ نگراں حکومت ملک میں آزادانہ اور شفاف انتخابات کے انعقاد میں الیکشن کمیشن آف پاکستان (ای سی پی) کو ہرممکن تعاون فراہم کرتے ہوئے اپنی آئینی ذمہ داریاں پوری کرے گی۔ وفاقی وزیر نے کہا کہ نگراں حکومت کا بنیادی مینڈیٹ ملک کے تمام صوبوں میں آزادانہ، منصفانہ اور شفاف انتخابات کے انعقاد کے لیے ای سی پی کو ہرممکن مدد فراہم کرنا ہے۔
