واشنگٹن ۔ 18 جنوری (اے پی پی) امریکی صدر ڈونلڈ ٹرمپ نے فوج کے میزائل ڈیفنس ریویو (ایم ڈی آر) کا افتتاح کر دیا ہے جس کا طویل عرصے سے انتظار کیا جا رہا تھا۔ یہ اقدام 2010ءکے بعد سے امریکہ کی دفاعی میزائل شکن پالیسی کا ایک جامع تجزیہ ہے۔اس موقع پر پینٹاگان میں تقریر کرتے ہوئے صدر ٹرمپ نے کہا کہ ان کا منصوبہ امریکہ کو کسی بھی جگہ، کسی بھی مقام پر اور کسی بھی وقت میزائل کا کھوج لگا کر اسے تباہ کرنے کی اجازت دے گا۔ا۔میزائل حملوں سے دفاع کا امریکی ادارہ ایم ڈی اے، آواز سے کئی گنا تیز رفتار میزائلوں کا راستہ روکنے کے لیے، خلا میں ایسے مراکز قائم کرنے کے امکانات کا جائزہ لے رہا ہے جہاں سے راکٹ داغ کر میزائل کو راستے میں ہی تباہ کر دیا جائے۔صدر ٹرمپ نے 2017ءمیں امریکہ کے میزائل سے دفاع کے نظام کی ٹیکنالوجی کے جائزے کا حکم دیتے ہوئے کہا تھا کہ اسے تبدیل ہوتے ہوئے خطرات کی مناسبت سے ڈھالا جائے۔ پینٹاگان نے اس سلسلے میں میڈیا کو ایک جامع رپورٹ مہیا کی ہے جس میں میزائلوں سے دفاع کے ادارے ایم ڈی اے نے تشویش ظاہر کی ہے۔تجزیاتی رپورٹ میں بتایا گیا ہے کہ چین اور روس آواز کی رفتار سے تیز پرواز کرنے والے میزائلوں کی جانب بڑھ رہے ہیں۔ پینٹاگان اس پہلو پر غور کر رہا ہے کہ ہائپر سونک میزائلوں کو روکنے کے لیے خلا میں پہلے سے نصب سینسر آلات سے مدد لی جائے۔ایم ڈی اے اس پہلو پر بھی سوچ رہا ہے کہ ایک ایسا دفاعی نظام تیار کیا جائے جو میزائل کو پرواز کے فوراً ہی بعد تباہ کر دے۔
