تہران۔21اپریل (اے پی پی):ایران کے نائب وزیر خارجہ کاظم غریب آبادی نے اعلان کیا ہے کہ ان کے ملک اور امریکا کے درمیان ماہرین کی سطح کے مذاکرات 23 اپریل کو سلطنت اومان میں منعقد ہوں گے اور اس دوران ثالث بھی موجود ہوں گے۔ العربیہ کے مطابق انہوں نے ایرانی پارلیمنٹ کی قومی سلامتی کمیٹی کو بتایا کہ مسقط میں تکنیکی ماہرین کا اجلاس منعقد کیا جا رہا ہے جس میں ثالثوں کی موجودگی میں مذاکرات کی تفصیلات پر تبادلہ خیال کیا جا رہا ہے۔
فریقین اس وقت مذاکرات کے انعقاد کے لیے اصول طے کرنے پر کام کر رہے ہیں۔ ایرانی نائب وزیر خارجہ نے مزید کہا کہ ان کا ملک یورینیم کو افزودہ کرنے کے اپنے حق کی توثیق کرتا ہے اور یہ مسئلہ تہران کے لیے مذاکرات میں ریڈ لائن کی حیثیت رکھتا ہے۔ واضح رہے کہ 19 اپریل کو ایران اور امریکا نے سلطنت عمان کی ثالثی میں ایران کے جوہری پروگرام سے متعلق صورتحال کو حل کرنے کے لیے روم میں بالواسطہ مذاکرات کا دوسرا دور منعقد کیا ہے۔
امریکی وفد کی سربراہی صدر ڈونلڈ ٹرمپ کے خصوصی ایلچی سٹیون وٹکوف کر رہے تھے اور ایرانی وفد کی سربراہی وزیر خارجہ عباس عراقچی کر رہے تھے۔ 23 اپریل کو تکنیکی سطح پر مشاورت کے بعد ایران اور امریکا کے درمیان ملاقات 26 اپریل کو ہونے والی ہے۔
دوسرے دور کے بعد عمانی وزارت خارجہ نے اعلان کیا ہے کہ امریکہ اور ایران ایک ایسے معاہدے پر بات کر رہے ہیں جو تہران کو پرامن ایٹمی توانائی تیار کرنے کی اپنی صلاحیت کو برقرار رکھنے کی اجازت دے گا۔
Short Link: https://urdu.app.com.pk/urdu/?p=584873
