واشنگٹن ۔ 11 اگست (اے پی پی) امریکہ میں کورونا وائرس سے متاثرہ افراد کی تعداد اور ہلاکتوں کی تعداد میں مسلسل اضافہ ہورہا ہے، امریکہ کی مختلف ریاستوں میںاس مہلک وائرس کے باعث اب تک ایک لاکھ66 ہزار سے زائد افراد ہلاک ہوچکے ہیں۔ منگل کو امریکی ذرائع ابلاغ کے مطابق ملک کی مختلف ریاستوں میں اب بھی کورونا وائرس کا پھیلاﺅ جاری ہے۔ امریکی محکمہ صحت کے مطابق ملک میں اس وقت کورونا وائرس کے متاثرین کی تعداد52 لاکھ 51 ہزار سے زائد ہے، ملک میں کورونا وائرس سے اب تک 166192ہلاک ہوچکے ہیں جبکہ اس وقت کورونا وائرس کے فعال کیسوں کی مصدقہ مجموعی تعداد2369320 ہے۔ حکام کا کہنا ہے کہ امریکہ میں کورونا وائرس سے متاثرہ 2715934 افراد اب تک صحتیاب ہوچکے ہیں۔ کورونا وائرس کی وبا سے امریکہ سب سے زیادہ متاثر ملک ہے۔ امریکہ کے علاوہ برازیل، بھارت، روس، جنوبی افریقہ، پیرو، میکسکو اور چلی میں لاکھوں افراد اس مہلک وائرس سے متاثر ہوئے ہیں۔ امریکہ میں کورونا وائرس کے پہلے کیس کی تشخیص اس سال 22 جنوری کو ہوئی تھی۔ امریکہ میں مہلک کورونا وائرس کے مریضوں کی تعداد میں چھ ماہ گزرنے کو بعد بھی تشویشناک حد تک اضافہ ہورہا ہے۔
