امریکی وفد نے بانی پی ٹی آئی کا کوئی ذکر نہیں کیا،سپیکرقومی اسمبلی

اسلام آباد۔15اپریل (اے پی پی):سپیکر قومی اسمبلی سردار ایاز صادق نے کہا ہے کہ امریکی وفد نے بانی پی ٹی آئی کا کوئی ذکر نہیں کیا،امریکی کانگرس کے وفد نے واضح کیاہے کہ پاکستان کے اندرونی سیاسی معاملات سےان کا کوئی تعلق نہیں ہے۔ منگل کو میڈیا کے نمائندوں سے ایک ملاقات میں بات چیت کرتے ہوئے انہوں نے کہا کہ ترکیہ کی اسمبلی کے سپیکر نے فلسطین کی صورت حال پر کانفرنس بلائی ہے،ترکیہ نے سپیکرز کو کانفرنس میں شرکت کیلئے مدعو کیا ہے، فلسطین کے عوام کی حالت زار کو دیکھ کر دل رنجیدہ ہوتا ہے، کانفرنس میں شرکت کروں گا اور پاکستان کا موقف پیش کروں گا۔

انہوں نے کہا کہ پاکستان کی حکومت اور عوام فلسطین کی عوام کے ساتھ ہیں،پاکستان کا فلسطین پر موقف واضح اور نمایاں ہے،فلسطین کے معصوم عوام پر اسرائیل ظلم کر رہا ہے، اپوزیشن ہر معاملے پر سیاست کرتی ہے،امریکی کانگرس کے دورہ پاکستان کے موقع پر بھی اپوزیشن نے سیاست کی،چیئرمین پی ٹی آئی گوہر خان اور چیف وہپ کو مدعو کیا تھا،اپوزیشن نے ایوان میں کنیالز کے معاملے پر بات کرنے کے موقع پر واک آؤٹ کیا،کینالز کے معاملے پر 30 سے زائد اراکین نے بات کی۔

ڈپٹی وزیراعظم سینیٹر اسحاق ڈار نے کینالز کے معاملے پر حکومتی موقف واضح طور پر پیش کیا،پیپلز پارٹی نے کینالز پر بات کرنے کے لئے 7 اپریل جبکہ اپوزیشن نے 10 اپریل کو قرارداد جمع کرائی۔ ایک سوال کے جواب میں انہوں نے کہا کہ کورم پورا کرنا حکومت کی ذمہ داری ہے، وزیر پارلیمانی امور کو کئی بار آگاہ کیا کہ قانون سازی کرانی ہے تو کورم کو پورا کیا جائے،گرفتار اراکین کیلئے پروڈکشن آرڈر جاری کئے،اپوزیشن کے زیر حراست ممبران کیلئے پارلیمنٹ لاجز کو سب جیل قرار دیا،ماضی کی حکومت نے پروڈکشن آرڈر جاری نہیں کئےتھے،ہر معاملے کو بات چیت سے حل کیا جاسکتا ہے۔

انہوں نے کہا کہ میں مذاکرات پر مکمل یقین رکھتا ہوں،مذاکرات کیلئے ہمیشہ سنجیدہ کوششیں کی ہیں،امریکی وفد نے بانی پی ٹی آئی کا کوئی ذکر نہیں کیا۔ انہوں نے کہا کہ امریکی کانگرس کے وفد نے واضح کیاہے کہ پاکستان کے اندرونی سیاسی معاملات سےان کا کوئی تعلق نہیں ہے، فیصلہ کیا گیا تھا کہ وقفہ سوالات میں کسی کو پوائنٹ آف آرڈر نہیں دیا جائے گا،

میری ہمیشہ سے یہ خواہش رہی ہے کہ وقفہ سوالات کو مکمل کیا جائے،وقفہ سوالات میں عوامی اہمیت کے حامل مسائل پر سوالات و جوابات لئے جاتے ہیں،ایوان کو خوش اسلوبی سے چلانا حکومت کے ساتھ ساتھ اپوزیشن کی بھی ذمہ داری ہے،اپوزیشن لیڈر کی جانب سے جمع کرائے گے سوالات اور توجہ دلاؤ نوٹسز کو ایجنڈے میں نا شامل کرنے کے حوالے سے انکے اعتراض کا ریکارڈ کے ساتھ تفصیلی خط ارسال کر دیا ہے۔

Short Link: https://urdu.app.com.pk/urdu/?p=582182