نئی دہلی ۔28اپریل (اے پی پی):بورڈ آف کنٹرول برائے کرکٹ ان انڈیا (بی سی سی آئی )کے زیراہتمام انڈین پریمیئر لیگ (آئی پی ایل) کا 18واں ایڈیشن بھارت میں جاری ہے جس میں شائقین کرکٹ کو انہتائی دلچسپ اور کانٹے دار مقابلے دیکھنے کو مل رہے ہیں،لیگ میں کل (منگل کو)مزید ایک میچ کھیلا جائے گا ۔لیگ کا 48واں میچ دفاعی چیمپئن کولکتہ نائٹ رائیڈرز اور دہلی کیپٹلز کی ٹیموں کے درمیان ارون جیٹلی سٹیڈیم، دہلی میں کھیلا جائے گا ۔
کولکتہ نائٹ رائیڈرز کی ٹیم کو مایہ ناز بلے باز اجنکیا رہانے لیڈ کریں گے جبکہ دہلی کیپٹلز کو مایہ ناز بائولنگ آل رائونڈر اکشر پٹیل لیڈ کریں گے ۔ لیگ کے 18ویں ایڈیشن میں شامل 10 ٹیموں کےدرمیان فائنل سمیت مجموعی طور پر74میچ کھیلے جائیں گے جو بھارت کے مختلف مقامات پر ہوں گے ،ان میں احمد آباد،بنگلورو ،چنائی ،نئی دہلی،دھرم شالہ ،وشاکاپٹنم ،گوہاٹی،حیدرآباد،جے پور،کولکتہ،لکھنو،موہالی ، ممبئی اور ملاں پور شامل ہیں۔لیگ میں کولکتہ نائٹ رائیڈرز کی ٹیم ٹائٹل کا دفاع کے لئے کوشاں ہے ۔
لیگ میں شامل 10 ٹیموں میں دفاعی چیمپئن کولکتہ نائٹ رائیڈرز کے علاوہ دیگر ٹیموں میں چنائی سپر کنگز،گجرات ٹائٹنز ،ممبئی انڈینز، دہلی کیپٹلز، پنجاب کنگز، راجستھان رائلز، رائل چیلنجرز بنگلور ، سن رائزرز حیدر آباد اور لکھنؤ سپر جائنٹس شامل ہیں۔
واضح رہے کہ چنائی سپر کنگز اور ممبئی انڈینز کو سب سے زیادہ پانچ پانچ بار آئی پی ایل کا ٹائٹل جیتنے کا اعزاز حاصل ہے ، کولکتہ نائٹ رائیڈرز نے تین جبکہ راجستھان رائلز، سن رائزرز حیدر آباد ، دکن چارجرز اور گجرات ٹائٹنز نے ایک ایک بار چیمپئن ہونے کا اعزاز حاصل کیا ۔آئی پی ایل کا فائنل میچ بھی کولکتہ میں 25 مئی کو شیڈول ہے۔
Short Link: https://urdu.app.com.pk/urdu/?p=588794
کھیلا جائے گا){kind=link}