نئی دہلی۔11اپریل (اے پی پی):بورڈ آف کنٹرول برائے کرکٹ ان انڈیا (بی سی سی آئی ) کے زیراہتمام انڈین پریمیئر لیگ (آئی پی ایل) کا 18واں ایڈیشن بھارت میں جاری ہے جس میں شائقین کرکٹ کو انہتائی دلچسپ اور کانٹے دار مقابلے دیکھنے کو مل رہے ہیں۔ انڈین پریمیئر لیگ میں کل (ہفتہ کو)مزید دو میچ کھیلے جائیں گے ۔
پہلے میچ میں لکھنؤ سپر جائنٹس اورگجرات ٹائٹنز کی ٹیمیں بھارت رتن شری اٹل بہاری واجپائی ایکنا کرکٹ سٹیڈیم، لکھنؤ کے مقام پر آمنے سامنے ہوں گی ۔ لکھنؤ سپر جائنٹس کو مایہ ناز وکٹ کیپر بلے باز ریشبھ پنت لیڈ کریں گے جبکہ گجرات ٹائٹنز کو مایہ ناز بلے باز شبمن گل لیڈ کریں گے ۔دوسرا میچ پنجاب کنگز اور سن رائزرز حیدر آباد کی ٹیمیں پنجہ آزما ہوں گی اور یہ میچ راجیو گاندھی انٹرنیشنل سٹیڈیم، حیدرآباد میں کھیلا جائے گا۔
پنجاب کنگز کو شریاس آئیر لیڈ کریں گے جبکہ سن رائزرز حیدر آباد کو مایہ ناز آسٹریلوی آل رائونڈر پیٹ کمنز لیڈ کریں گے۔ لیگ کے 18ویں ایڈیشن میں شامل 10 ٹیموں کےدرمیان فائنل سمیت مجموعی طور پر74میچ کھیلے جائیں گے جو بھارت کے مختلف مقامات پر ہوں گے ،ان میں احمد آباد،بنگلورو ،چنائی ،نئی دہلی،دھرم شالہ ،وشاکاپٹنم ،گوہاٹی،حیدرآباد،جے پور،کولکتہ،لکھنو،موہالی ، ممبئی اور ملاں پور شامل ہیں۔آئی پی ایل کے 16 ویں ایڈیشن میں گوہاٹی سٹیڈیم نے اپنا آئی پی ایل ڈیبیو کیا تھا ۔لیگ میں کولکتہ نائٹ رائیڈرز کی ٹیم ٹائٹل کا دفاع کے لئے ایکشن میں ہوگی ۔
لیگ میں شامل 10 ٹیموں میں دفاعی چیمپئن کولکتہ نائٹ رائیڈرز کے علاوہ دیگر ٹیموں میں چنائی سپر کنگز،گجرات ٹائٹنز ،ممبئی انڈینز، دہلی کیپٹلز، پنجاب کنگز، راجستھان رائلز، رائل چیلنجرز بنگلور ، سن رائزرز حیدر آباد ،اور لکھنؤ سپر جائنٹس شامل ہیں۔
واضح رہے کہ چنائی سپر کنگز اور ممبئی انڈینز کو سب سے زیادہ پانچ پانچ بار آئی پی ایل کا ٹائٹل جیتنے کا اعزاز حاصل ہے ، کولکتہ نائٹ رائیڈرز نے تین جبکہ راجستھان رائلز، سن رائزرز حیدر آباد ، دکن چارجرز اور گجرات ٹائٹنز نے ایک ایک بار چیمپئن ہونے کا اعزاز حاصل کیا ۔آئی پی ایل کا فائنل میچ بھی کولکتہ میں 25 مئی کو شیڈول ہے۔
Short Link: https://urdu.app.com.pk/urdu/?p=580507
