نئی دہلی۔25فروری (اے پی پی):بورڈ آف کنٹرول برائے کرکٹ ان انڈیا (بی سی سی آئی ) کے زیراہتمام انڈین پریمیئر لیگ (آئی پی ایل) کا 18واں ایڈیشن 22مارچ 2025سے بھارت میں شروع ہوگا جس کے انعقاد کے لئے تیاریاں شروع کر دی گئ ہیں۔
ٹورنامنٹ کے انتہائی دلچسپ اور کانٹےدارمقابلوں میں ملکی اور غیر ملکی کھلاڑی ایکشن میں ہوں گے ۔ لیگ کے 18ویں ایڈیشن میں شامل 10 ٹیموں کےدرمیان فائنل سمیت مجموعی طور پر74میچ کھیلے جائیں گے جو بھارت کے مختلف مقامات پر ہوں گے ،ان میں احمد آباد،بنگلورو ،چنائی ،نئی دہلی،دھرم شالہ ،وشاکاپٹنم ،گوہاٹی،حیدرآباد،جے پور،کولکتہ،لکھنو،موہالی ، ممبئی اور ملاں پور شامل ہیں۔آئی پی ایل کے 16 ویں ایڈیشن میں گوہاٹی سٹیڈیم نے اپنا آئی پی ایل ڈیبیو کیا تھا ۔
لیگ میں کولکتہ نائٹ رائیڈرز کی ٹیم ٹائٹل کا دفاع کے لئے ایکشن میں ہوگی ۔ لیگ میں شامل 10 ٹیموں میں دفاعی چیمپئن کولکتہ نائٹ رائیڈرز کے علاوہ دیگر ٹیموں میں چنائی سپر کنگز،گجرات ٹائٹنز ،ممبئی انڈینز، دہلی کیپٹلز، پنجاب کنگز، راجستھان رائلز، رائل چیلنجرز بنگلور ، سن رائزرز حیدر آباد ،اور لکھنؤ سپر جائنٹس شامل ہیں۔
واضح رہے کہ چنائی سپر کنگز اور ممبئی انڈینز کو سب سے زیادہ پانچ پانچ بار آئی پی ایل کا ٹائٹل جیتنے کا اعزاز حاصل ہے ، کولکتہ نائٹ رائیڈرز نے تین جبکہ راجستھان رائلز، سن رائزرز حیدر آباد ، دکن چارجرز اور گجرات ٹائٹنز نے ایک ایک بار چیمپئن ہونے کا اعزاز حاصل کیا ۔آئی پی ایل کا لیگ مرحلہ بھارت کے مختلف مقامات پر کھیلا جائے گا ،افتتاحی میچ ایڈن گارڈنز کولکتہ میں کوالیفائر 2 اور فائنل کے ساتھ کھیلا جائے گا۔
کوالیفائر 1 اور ایلیمینیٹر حیدرآباد کے راجیو گاندھی انٹرنیشنل کرکٹ سٹیڈیم میں کھیلے جائیں گے۔آئی پی ایل کا افتتاحی میچ دفاعی چیمپئن کولکتہ نائٹ رائیڈرز اور رائل چیلنجرز بنگلور کی ٹیموں کے درمیان کولکتہ میں کھیلا جائے گا۔آئی پی ایل کا فائنل میچ بھی کولکتہ میں ہی 25 مئی کو شیڈول ہے۔
Short Link: https://urdu.app.com.pk/urdu/?p=565814
