اپوزیشن حکومت کے عوام دوست اقدامات سے چاروں شانے چت ہو چکی ہے، حسان خاور

لاہور۔3فروری (اے پی پی):معاون خصوصی وزیر اعلی پنجاب برائے اطلاعات و ترجمان حکومت پنجاب حسان خاور نے بزدار حکومت کے گزشتہ تین سالہ عرصہ کو انقلابی تعمیر و ترقی اور تبدیلی کے سال قرار دیتے ہوئے کہا ہے کہ بزدار حکومت نے محکمہ آبپاشی میں انتظامی بہتری اور مفاد عامہ کیلئے نئی پالیسیاں اور قوانین کا آغاز کیا ہے جن کے تحت بیراجوں اور نہروں کے نظام کی بحالی، رودکوئیوں میں پانی کو ذخیرہ اور قابل استعمال بنانے کے کئی منصوبوں سمیت کینالز کی تعمیر و بحالی کے میگا پراجیکٹس سے عوام کو سہولیات مہیا کی جا رہی ہیں۔

انہوں نے بتایا کہ پی ٹی آئی حکومت نے 32 ارب کی خطیر رقم سے جلال پور کینال منصوبہ شروع کیا جس سے ضلع جہلم اور خوشاب کا پونے دو لاکھ ایکڑ رقبہ سیراب ہوگا، دوسری جانب گریٹر تھل کینال منصوبہ ضلع بھکر، لیہ، خوشاب، مظفر گڑھ اور جھنگ کے قریبا تین لاکھ ایکڑ رقبے کو سیراب کرے گا جبکہ ایس ایم بی لنک کینال کی ترسیل کی صلاحیت 13 ہزار کیوسک سے بڑھائی جا رہی ہے۔

انہوں نے کہا کہ بزدار حکومت ہر شعبہ میں ریکارڈ کامیابیاں سمیٹ رہی ہے، عوام تک مہنگائی کےاثرات کم کرنے کے لئے حکومت احساس راشن پروگرام اور صحت کارڈ جیسی سہولیات متعارف کرا رہی ہے۔ حسان خاور نے مزید کہا کہ غیر متحدہ اپوزیشن وزیرِ اعظم عمران خان اور بزدار حکومت کے عوام دوست اقدامات سے چاروں شانے چت ہو چکی ہے، پاکستان تحریکِ انصاف عوامی خدمت سے اگلے انتخابات میں بھی سرخرو ہو گی۔

Short Link: https://urdu.app.com.pk/urdu/?p=293597