اسلام آباد۔28اگست (اے پی پی):نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر نے دریائے چناب اور راوی میں شدید سیلابی صورتحال کا الرٹ جاری کیا ہے، سیلابی ریلوں کی آمد کے باعث دریائے چناب کے بہاؤ میں نمایاں اضافہ متوقع ہے۔
جمعرات کو این ڈی ایم اے سے جاری بیان کے مطابق 31 اگست کو دوپہر 4 بجے کے قریب تریموں بیراج پر پانی کا بہاؤ 7لاکھ سے 8لاکھ کیوسک تک متوقع ہے جس کے باعث شدید سیلابی صورتحال کا خدشہ ہے،ممکنہ شدید سیلابی صورتحال جھنگ اور اس کے ملحقہ علاقوں کو متاثر کرے گی۔
یہ بھی کہا گیا کہ یہ سیلابی ریلے 3 ستمبر 2025 کی دوپہر تک پنجند تک پہنچیں گے جہاں 6لاکھ50ہزار سے7لاکھ کیوسک کا بہاؤ متوقع ہے جس سے شدید سیلابی صورتحال کا خدشہ ہے۔ ممکنہ متاثرہ اضلاع بشمول حافظ آباد، چنیوٹ، ملتان، پنجنداور بہاولپور کے علاقوں میں انخلاء کی کےلئے ہدایات جاری کر دی ہیں۔ دریائے چناب کے بائیں کنارے پر واقع 18 ہزاری کا علاقہ ممکنہ سیلابی صورتحال سے نمٹنے کے لئے بریچنگ سائٹ کے طور پر استعمال کیا جا سکتا ہے۔
دریائے راوی میں پانی کی سطح میں تیزی سے اضافہ متوقع ہے۔ 29 اگست کو صبح 7 بجے بلاکی بیراج پر ایک لاکھ50ہزار سے 2لاکھ کیوسک کے درمیان بلند سطح کا سیلاب متوقع ہے۔ یکم ستمبر تک سیلابی ریلہ سدھنائی تک پہنچے گا جو خطرناک حد تک ایک لاکھ 25ہزار سے ایک لاکھ 50ہزار کیوسک تک رہنے کا امکان ہے۔ ہائی رسک یونین کونسلز میں لاہور کے علاقے شاہدرہ، کوٹ محبو، جیا موسیٰ، عزیز کالونی، قیصر ٹاؤن، فیصل پارک، دھیر، کوٹ بیگم شامل ہے۔
شیخوپورہ ،فیروزوالہ میں فیض پور خو، دھمیکے، ڈاکہ، برج عطاری، کوٹ عبدالمال سیلاب کا خطرہ ہے۔ ضلع شیخوپورہ ،ننکانہ صاحب کے علاقے گنیش پور اور ضلع قصور، پتوکی میں پھول نگر، رکھ خان کے، نتی خالص، لمبے جگیر، کوٹ سردار، ہنجرائے کلاں، بھتروال کلاں، نوشہرہ گئے کے علاقے شامل ہیں۔ ضلع خانیوال میں غوث پور ،میاں چنوں، امیر گڑھ، کوٹ اسلام، عبدالحکیم ،کبیروالہ، سیلاب کا شکار ہو سکتے ہیں۔ وزیراعظم کی ہدایت پر این ڈی ایم اے تمام ریسکیو و ریلیف سرگرمیاں کی نگرانی کر رہا ہے ،
نیشنل ایمرجنسیز آپریشن سینٹر 24 گھنٹے کے لئے مکمل فعال ہے، این ڈی ایم اے سول و عسکری اداروں کے ساتھ رابطے میں ہے ۔دریاؤں کے کناروں اور واٹر ویز پر رہائش پذیر افراد فوری طور پر محفوظ مقامات پر منتقل ہو جائیں، مقامی انتظامیہ کی ہدایات پر فوری عمل کریں اور ہنگامی حالات میں امدادی ٹیموں سے رابطہ کریں، سیلاب زدہ علاقوں میں غیر ضروری سفر سے مکمل گریز کریں۔ ہنگامی کٹ (پانی، خوراک، ادویات) تیار رکھیں اور اہم دستاویزات محفوظ کریں۔مزید رہنمائی کے لئے این ڈی ایم اے ڈیزاسٹر الرٹ ایپ استعمال کریں۔
