اسلام آباد۔17اپریل (اے پی پی):اسلام آباد ہائیکورٹ کے قائم مقام چیف جسٹس سرفراز ڈوگر اور جسٹس انعام امین منہاس پر مشتمل ڈویڑن بنچ نے 190 ملین پائونڈ ریفرنس میں بانی پی ٹی آئی اور بشریٰ بی بی کی اپیلیں اور سزا معطلی کی جلد سماعت کی متفرق درخواستیں منظو ر کرتے ہوئے سزا کے خلاف اپیلیں دو ہفتوں میں مقرر کرنے کی ہدایت کر دی اور کہاکہ بانی پی ٹی آئی اور بشریٰ بی بی کی سزا معطلی کی درخواستیں بھی ساتھ دیکھ لیں گے۔ گذشتہ روز سماعت کے دوران بانی پی ٹی آئی کی جانب سے وکیل ظہیر عباس اور عثمان ریاض گل جبکہ بشریٰ بی بی کی جانب سے وکیل علی بخاری ایڈووکیٹ عدالت میں پیش ہوئے۔
علی بخاری ایڈووکیٹ نے کہاکہ سزا معطلی کی درخواستیں بھی مقرر کرنے کی تاریخ دے دیں۔ قائم مقام چیف جسٹس سرفرازڈوگر نے کہاکہ ڈویژن بنچ نے کیسز مقرر کرنے سے متعلق جوڈیشل آرڈر جاری کر دیا ہے،جوڈیشل آرڈر کے بعد ہم ڈائریکٹ کوئی تاریخ نہیں دے سکتے،ہم سزا کے خلاف اپیلوں کے ساتھ سزا معطلی کی درخواستیں بھی دیکھ لیں گے۔ عدالت نے جلد سماعت کی دونوں متفرق درخواستیں منظور کر لیں۔واضح رہے کہ بانی پی ٹی آئی اور بشریٰ بی بی نے جلد سماعت کی درخواستیں دائر کر رکھی ہیں۔
بانی پی ٹی آئی 14 سال جبکہ بشریٰ بی بی سات سال کی سزا کاٹ رہے ہیں،دونوں کی جانب سے اپیلیں اور سزا معطلی کی درخواست دائر کی گئی ہیں۔
Short Link: https://urdu.app.com.pk/urdu/?p=583681
