برسلز۔13دسمبر (اے پی پی):برسلز میں پاکستانی سفارتخانے نے یورپی یونین کے رکن ممالک میں پاکستانی مشنز کے لیے تجارتی تعلقات کے ابھرتے افق پر ایک ورچوئل بریفنگ سیشن کا انعقاد کیا۔ جی ایس پی پلس اسکیم کے دائرہ کار کو بڑھانے اور یورپی پارلیمنٹ کے ذریعہ جی ایس پی ریگولیشن کی توسیع سے متعلق اہم میکانزم اور پیشرفت سے لے کر اہم تجارتی پہلوؤں پر جامع بریفنگ شئیر کی گئی ۔ اجلاس میں وزارت خارجہ، تجارت، ٹریڈ ڈویلپمنٹ اتھارٹی آف پاکستان اور یورپ میں قائم تمام پاکستانی سفارتی مشنز کے نمائندگان نے شرکت کی۔
بدھ کو پاکستانی سفارتخانہ سے جاری پریس ریلیز کے مطابق یورپی یونین، بیلجیئم اور لکسمبرگ میں پاکستان کی سفیر آمنہ بلوچ نے شرکا کے بہتر ادراک کے لیے تجارتی اور ترقیاتی تعلقات کے بارے میں خاکہ پیش کیا ۔ انہوں نے یورپی یونین میں پاکستان کے سفارتی مشنز کے درمیان تجارتی مسائل کے حل اور امکانات کے حوالے سے ایک متفقہ نقطہ نظر کو یقینی بناتے ہوئے قریبی رابطہ کاری کی ضرورت پر زور دیا۔
سیشن کے دوران ٹی ڈی اے پی کو حکومت پاکستان کی جانب سے لاہور میں 18 سے 20 جنوری 2023 تک منعقد کیے جانے والے تیسرے انجینئرنگ اینڈ ہیلتھ کیئر شو کی تفصیلات بتانے کے لیے مدعو کیا گیا تاکہ یورپ سے ممکنہ خریداروں اور سرمایہ کاروں کی زیادہ سے زیادہ شرکت کو یقینی بنایا جا سکے۔ یہ اقدام بیلجیئم میں پاکستانی سفارت خانے کے یورپی یونین میں پاکستان کے تجارتی اور اقتصادی مفادات کے تحفظ کے لیے پاکستانی سفارتی مشنز کے درمیان باہمی تعاون کے عزم کی نشاندہی کرتا ہے۔
Short Link: https://urdu.app.com.pk/urdu/?p=419739
