اسلام آباد۔31اگست (اے پی پی):برطانوی شہزادی لیڈی ڈیانا کی برسی اتوار 31 اگست کو منائی گئی۔ کروڑوں دلوں پر راج کرنے والی برطانوی شہزادی لیڈی ڈیانا کی برسی کی تقریبات برطانیہ سمیت دنیا کے مختلف ممالک میں منائی گئیں۔
پرنسس آف ویلزکے نام سے دنیا بھر میں اپنی منفرد پہچان کی حامل لیڈی ڈیانا یکم جولائی 1961 کو برطانیہ کے علاقے نورفوک میں پیدا ہوئی اور 29 جولائی 1981ء کو برطانیہ کے ولی عہد شہزادہ چارلس کے ساتھ رشتہ ازدواج میں منسلک ہوئیں۔لیڈی ڈیانا کی شادی کو فیری ٹیل میرج قرار دیا گیا اور دنیا بھر میں کروڑوں لوگوں نے شادی کی تقریب دیکھی تاہم دنیا کے مقبول ترین شاہی جوڑے کی شادی کے سولہ سال بعد اگست 1996 میں طلاق ہوگئی۔
ان کے دو بیٹے شہزادہ ولیم اور شہزادہ ہیری ہیں۔طلاق کے بعد بھی شہزادی ڈیانا کی مقبولیت میں کوئی کمی نہ آئی۔ ظاہری خوبیوں کے علاوہ لیڈی ڈیانا کو فلاحی کاموں کی وجہ سے ہمیشہ یاد رکھا جائے گا۔شہزادی لیڈی ڈیانا نے کینسر میں مبتلا لوگوں کو زندگی کی امید دلائی اور مصیبت زدہ لوگ ہمیشہ لیڈی ڈیانا کی توجہ کا محور رہے۔لیڈی ڈیانا نے 1995 اور 1997 میں پاکستان کے دورے کئے۔ لیڈی ڈیانا 31 اگست 1997ء کو پیرس میں ایک کار حادثے کے نتیجے میں زندگی سے ہاتھ دھو بیٹھیں۔ ان کی برسی کے موقع پر ان کو بھر پور انداز میں خراج تحسین پیش کیا گیا۔
