اسلام آباد۔5نومبر (اے پی پی):وزیر خارجہ بلاول بھٹو زرداری اور وزیر مملکت برائے امور خارجہ حنا ربانی کھر نے یورپی یونین کے اعلی سطحی نمائندہ برائے خارجہ امور و سیکیورٹی پالیسی جوزپ بوریل اور سیاسی امور کے ڈپٹی سیکرٹری جنرل یورپین ایکسٹرنل ایکشن سروس اینریک مورا سے متحدہ عرب امارات میں ملاقات کی۔ وزیر خارجہ نے پاکستان اور یورپی یونین کے درمیان کثیر جہتی تعلقات پر اطمینان کا اظہار کیا جو کہ وقت کے ساتھ ساتھ مزید مضبوط ہوئے ہیں۔
انہوں نے کہا کہ گزشتہ ماہ اسلام آباد میں مشترکہ کمیشن کے انعقاد اور اس ہفتے یورپی پارلیمنٹ کے اراکین کے دورہ سمیت دونوں فریقوں کے درمیان حالیہ بات چیت نے دوطرفہ تعلقات میں مثبت رفتار کو برقرار رکھا ہے۔
وزیر خارجہ نے حالیہ موسمیاتی سیلاب سے ہونے والی تباہی کے بعد یورپی یونین اور اس کے رکن ممالک کی جانب سے پاکستان کو 133 ملین یورو کی انسانی امداد کو بھی سراہا۔ انہوں نے یورپی یونین کے اعلی نمائندے کو بحالی اور تعمیر نو کے کاموں کے سلسلے میں پاکستان کو درپیش ایک بڑے چیلنج سے بھی آگاہ کیا۔ انہوں نے عالمی برادری سے مطالبہ کیا کہ وہ اس موقع پر آگے بڑھیں اور پاکستان کے لیے ماحولیاتی انصاف کو یقینی بنائیں۔ اعلی نمائندے نے مشکل چیلنج سے نمٹنے میں وزیر خارجہ کو مکمل تعاون کا یقین دلایا۔
وزیر خارجہ اور یورپی یونین کے اعلی نمائندے نے جی ایس پی پلس پر بھی تبادلہ خیال کیا اور کہا کہ یہ اسکیم پاکستان اور یورپی یونین دونوں کے لیے باہمی طور پر فائدہ مند ہے۔ وزیر خارجہ نے امید ظاہر کی کہ پاکستان اور یورپی یونین مستقبل میں بھی اس سے مستفید ہوتے رہیں گے۔
اعلی نمائندے نے جی ایس پی پلس اسکیم کا حصہ بننے والے بین الاقوامی کنونشنز پر عمل درآمد میں پاکستان کی پیش رفت کو سراہا۔وزیر خارجہ نے اعلی نمائندے پر زور دیا کہ یورپی یونین پاکستان کو جلد از جلد اپنے اے ایم ایل/سی ایف ٹی حکومتوں میں اسٹریٹجک خامیاں رکھنے والے ممالک کی فہرست سے خارج کر دے، جب کہ پاکستان گزشتہ ماہ فیٹیفکی گرے لسٹ سے نکل گیا ہے۔
اعلی نمائندے نے فیٹیف کے دو ایکشن پلانز کی تکمیل میں پاکستان کی نمایاں پیش رفت کو سراہا اور وزیر خارجہ کو یقین دلایا کہ یورپی یونین پاکستان کو جلد ہی ڈی لسٹ کر دے گی۔ دونوں فریقین نے پاکستان اور یورپی یونین کے تعلقات کو مزید مستحکم کرنے اور قائم شدہ ادارہ جاتی میکانزم کے ساتھ منسلک رہنے پر اتفاق کیا۔
Short Link: https://urdu.app.com.pk/urdu/?p=336027
