برسلز۔13جون (اے پی پی):سابق وزیر خارجہ بلاول بھٹو زرداری کی قیادت میں پاکستانی وفد نے یورپی یونین کے اہم شخصیات سے ملاقاتوں میں پاکستان کے مسلسل تحمل پر مبنی رویے ، ذمہ داری اور اصولوں پر مبنی مکالمے کے نقطہ نظر سے آگاہ کیا۔ وفد نے بین الاقوامی قانون اور اقوام متحدہ کی سلامتی کونسل کی قراردادوں بالخصوص جموں و کشمیر کے تنازع کے حوالے سے تنازعات کے پرامن حل کے لیے پاکستان کے اصولی عزم کا اعادہ کیا۔
جمعہ کو برسلز میں قائم پاکستانی سفارتخانہ سے جاری بیان کے مطابق رکن قومی اسمبلی اور سابق وزیر خارجہ بلاول بھٹو زرداری کی سربراہی میں پاکستان کے ایک اعلیٰ سطحی پارلیمانی وفد نے برسلز کے اپنے سرکاری دورے کا آغاز کیا جس میں پاکستان کی ابھرتی ہوئی علاقائی سلامتی کے خدشات اور بھارت کے حالیہ جارحیت کے خلاف اصولی ردعمل پر توجہ مرکوز کی گئی ہے ۔
یہ دورہ بھارت کی غیر قانونی جارحیت، بین الاقوامی قوانین کی بار بار خلاف ورزیوں، اور سندھ طاس معاہدے کو معطل کرنے کے اس کے یکطرفہ فیصلے کی وجہ سے بگڑتے ہوئے جنوبی ایشیا کے سلامتی کے ماحول پر اپنا نقطہ نظر پیش کرنے کے لیے پاکستان کی بین الاقوامی رسائی کا حصہ ہے۔ وفد نے یورپی پارلیمنٹ میں بین الاقوامی تجارت کی کمیٹی (انٹا) کے سربراہ برنڈ لینج سے ملاقات کی۔ چیئرمین بھٹو زرداری نے علاقائی سلامتی کی صورتحال اور علاقائی تجارت اور رابطوں پر بھارت کے جارحانہ موقف کے منفی اثرات کے بارے میں بات چیت کرنے کے حوالے سے آگاہ کیا۔
اجلاس میں جی ایس پی پلس فریم ورک کے تحت پاکستان کی جاری مصروفیات کا بھی احاطہ کیا گیا۔ چیئرمین پیپلز پارٹی بلاول بھٹو زرداری نے یورپی یونین کے ساتھ تعمیری مذاکرات اور باہمی طور پر فائدہ مند تجارت کے لیے پاکستان کے عزم پر زور دیا۔وفد نے بیلجیئم کی وزارت خارجہ میں دو طرفہ امور کی ڈائریکٹر جنرل برجٹ سٹیونز سے ملاقات کی۔ موجودہ علاقائی تناظر میں دوطرفہ تعلقات کے اسٹریٹجک جہتوں پر بات چیت کی گئی۔ پاکستانی وفد نے کثیرالجہتی اور قواعد پر مبنی نظم کے لیے بیلجیئم کی مسلسل حمایت کا خیرمقدم کیا اور جنوبی ایشیا میں بین الاقوامی قانون کو برقرار رکھنے کی ضرورت سمیت امن و سلامتی سے متعلق امور پر کثیرالجہتی فورمز میں قریبی رابطہ کاری کی حوصلہ افزائی کی۔
دونوں فریقوں نے ایک چیلنجنگ عالمی منظر نامے میں دوطرفہ تعلقات کو مضبوط بنانے کے لیے ادارہ جاتی میکانزم کی اہمیت پر اتفاق کیا۔بیلجیئم کی پارلیمنٹ میں، وفد نے بیلجیئم کے سینئر قانون سازوں سے ملاقاتیں کیں جن میں خارجہ امور کی کمیٹی کی وائس چیئر مین کیتھلین ڈیپورٹر اور پاکستان بیلجیئم پارلیمانی فرینڈ شپ گروپ کے چیئرمین فرینکی ڈیمن شامل تھے۔ دونوں ایوانوں کے ارکان نے اس دورے کو پارلیمانی تبادلوں کو مضبوط کرنے کا ایک بروقت موقع قرار دیا۔ پاکستانی وفد نے انہیں بھارت کی حالیہ فوجی جارحیت، سرحد پار سے متعلق غلط معلومات اور مشترکہ وسائل کوہتھیار بنانے کے سنگین مضمرات سے آگاہ کیا۔
وفد نے ہر قسم کی دہشت گردی کا مقابلہ کرنے کے لیے پاکستان کے عزم کا اعادہ کیا اور ہندوستان کی سرحد پار سرگرمیوں اور قتل و غارتگری کی سازشوں سے نمٹنے کی فوری ضرورت پر زور دیا، جو بین الاقوامی قوانین پر مبنی نظام کے لیے خطرہ ہیں.اس دن کا اختتام ایگمونٹ – رائل انسٹی ٹیوٹ فار انٹرنیشنل ریلیشنز میں ایک اعلیٰ سطحی پالیسی گول میز کے ساتھ ہوا۔جس سےبلاول بھٹو زرداری نے ایک کلیدی خطاب کیا، جس میں بھارت کی حالیہ فوجی مہم جوئی اور نظرثانی کے نظریات سے لاحق خطرات پر روشنی ڈالی۔
انہوں نے کہا کہ سندھ طاس معاہدے کو معطل کرنے کا بھارتی فیصلہ ماحولیاتی سلامتی اور عالمی معاہدے کی سالمیت کے لیے براہ راست خطرہ ہے۔ انہوں نے جنوبی ایشیا میں موسمیاتی عدم تحفظ کے غیر متناسب اثرات کو اجاگر کیا اور اجتماعی ذمہ داری کی ضرورت پر زور دیا جبکہ یکطرفہ معاہدے کی خلاف ورزیوں کی مثال کے خلاف متنبہ کیا۔دن بھر کی مصروفیات کے دوران، پاکستانی وفد نے مسلسل پاکستان کے تحمل، ذمہ داری اور اصولوں پر مبنی مکالمے کے نقطہ نظر سے آگاہ کیا۔
وفد نے بین الاقوامی قانون اور اقوام متحدہ کی سلامتی کونسل کی قراردادوں بالخصوص جموں و کشمیر کے تنازع کے حوالے سے تنازعات کے پرامن حل کے لیے پاکستان کے اصولی عزم کا اعادہ کیا۔ بات چیت میں پاکستان کے بڑھتے ہوئے سفارتی عزم کی عکاسی ہوتی ہے تاکہ اس بات کو یقینی بنایا جا سکے کہ علاقائی کشیدگی اور غلط معلومات کی مہمات کے درمیان اس کے موقف کو واضح طور پر سمجھا جائے۔مصروفیات کا پہلا دن پاکستان کی خارجہ پالیسی کی ترجیحات کی توثیق کرنے، اہم بین الاقوامی فورمز پر اپنے علاقائی تناظر کو پیش کرنے اور امن، مذاکرات اور بین الاقوامی قانون کے لیے پرعزم یورپی اداروں کے ساتھ گہرا تعلق قائم کرنے میں ایک اہم قدم قرار دیاگیا۔
وفد میں ڈاکٹر مصدق مسعود ملک، وزیر برائے موسمیاتی تبدیلی اور ماحولیاتی رابطہ،سینیٹر شیری رحمان، چیئرپرسن، سینیٹ کی قائمہ کمیٹی برائے موسمیاتی تبدیلی اور سابق وفاقی وزیر، حنا ربانی کھر، چیئرپرسن، قومی اسمبلی کی قائمہ کمیٹی برائے خارجہ امور اور سابق وزیر خارجہ،انجینئر خرم دستگیر خان، سابق وزیر تجارت، دفاع اور خارجہ امور،سینیٹر سید فیصل علی سبزواری، سینیٹ میں ایم کیو ایم کے پارلیمانی لیڈر اور سابق وزیر برائے سمندری امور،سابق خارجہ سیکرٹریزسفیر جلیل عباس جیلانی اور سفیر تہمینہ جنجوعہ شامل تھے ۔
