اسلام آباد۔23مئی (اے پی پی):وزیر اعظم محمد شہباز شریف نے کہا ہے کہ 10 مئی کو افواج پاکستان نے قوم کے اتحاد اور اتفاق سے بھارت کو جو شکست فاش دی دشمن اسے قیامت تک یاد رکھے گا۔ وہ جمعہ یہاں مری روڈ انٹر چینج جناح سکوائر کے افتتاح کے موقع پر منعقد تقریب سے خطاب کر رہے تھے ، اس موقع پر وفاقی وزرا حنیف عباسی ، طارق فضل چوہدری ، طلال چوہدری کے علاوہ سی ڈی اے اور اسلام آباد پولیس کے اعلیٰ حکام بھی موجود تھے ۔
وزیر اعظم نے کہاکہ وہ ایک بار پھر قوم کو دل کی گہرائیوں سے مبارکباد دیتے ہیں، 10 مئی کو افواج پاکستان نے اپنی بہترین حکمت عملی اور بہادری سے بھارت کو جو شکست فاش دی یہ اللہ تعالیٰ کا خاص انعام اور مہربانی ہے ۔ انہوں نے کہا کہ قوم کے اتحاد و اتفاق کی شاندار تاریخ دشمن قیامت تک یاد رکھے گا ۔
وزیر اعظم نے جناح سکوائر کے منصوبے کی 35 دن میں تکمیل پر سی ڈی اے ، متعلقہ کمپنی کے ذمہ داران اور وزیر داخلہ محسن نقوی کو مبارکباد دیتے ہوئے کہا کہ اس مختصر مدت میں منصوبے کی تکمیل آسان کام نہ تھا ۔ انہوں نے وفاقی دارالحکومت کی انتظامیہ اور سی ڈی اے کو مزید مستعدی اور محنت اور لگن سے کام کرنے اور اسلام آباد کو مزید خوبصورت بنانے کیلئے اقدامات کی ہدایت کی ۔
وزیر داخلہ محسن نقوی نے اس موقع پر خطاب کرتے ہوئے کہا کہ یہ منصوبہ 35 روز کی ریکارڈ مدت میں مکمل کیا گیا تاکہ شہریوں کیلئے کم سے کم مشکلات پیداہوں۔منصوبے کے تعمیراتی معیار پر کوئی سمجھوتہ نہیں کیا گیا اور بہترین اور معیاری تعمیر کو یقینی بنایا گیا ۔ انہوں نے کہاکہ فیض آباد چوک پر پل کو چوڑا کرنے ، شاہین چوک اور کشمیر چوک سمیت کئی اور منصوبوں پر جلد کام شروع کیا جا ئے گا ۔
واضح رہے کہ پاکستان کی تاریخ میں پہلی بار صرف 35 روز کی ریکارڈ مدت میں انڈر پاس پراجیکٹ مکمل کیاگیا ہے ۔وزیرداخلہ محسن نقوی کی ہدایت پر لینڈ سکیپنگ اور ہارٹیکلچر کا کام جاری ہے ۔ اس منصوبے سے مری جانے والے شہریوں کو آمدورفت میں بہت سہولت ملے گی۔ وقت کے ساتھ شہریوں کو ایندھن کی بھی بچت ہو گی۔ چئیرمین سی ڈی اے محمد علی رندھاوا نے پراجیکٹ کی تکمیل کے بارے بریفنگ دی۔
Short Link: https://urdu.app.com.pk/urdu/?p=600585
