بھارت جتنی طاقت استعمال کرے گا ہم اس سے زیادہ طاقت سے جواب دیں گے، وزیر دفاع خواجہ محمد آصف

اسلام آباد۔30اپریل (اے پی پی):وزیر دفاع خواجہ محمد آصف نے کہا ہے کہ بھارت جتنی طاقت استعمال کرے گا ہم اس سے زیادہ طاقت سے جواب دیں گے، ہماری طرف سے جنگ کا آغاز نہیں ہوگا لیکن اگر جنگ مسلط کی تو بھرپور جواب دیں گے۔ وہ بدھ کو پارلیمنٹ ہاؤس کے باہر میڈیا سےگفتگو کر رہے تھے ۔ وزیر دفاع نے کہا کہ دوست ممالک، پڑوسی ممالک اور خطے کی بڑی طاقتیں بھی ثالثی کا کردار ادا کر رہی ہیں، دوست ممالک چاہتے ہیں کہ جنگ کی صورتحال نہ بنے، اللہ کرے ان ممالک کی کوششوں سے بھارت کو کچھ عقل آئے۔

خواجہ آصف نے کہا کہ جس طرح کا بھارت کا عمل ہوگا اسی طرح کا رد عمل دیا جائےگا،کسی کو کچھ شک نہیں ہونا چاہیے، بھارت کو بھرپور جواب دیں گے۔خواجہ آصف نے کہا کہ جیسے جیسے وقت گزر رہا ہے حملے کے خطرات بڑھ رہے ہیں، ہماری طرف سے جنگ کا آغاز نہیں ہوگا لیکن اگر جنگ مسلط کی تو بھرپور جواب دیں گے، بھارت جتنی طاقت استعمال کرےگا اس سے زیادہ ہم طاقت سے جواب دیں گے۔وزیردفاع کا کہنا تھا کہ شہباز شریف نے واضح کیا ہےکہ معاملے کی بین الاقوامی سطح پر تحقیقات کروائی جائیں، عالمی تحقیقات کے مطالبے پر بھارت نے کوئی جواب نہیں دیا، مطلب دال میں کچھ کالا ہے۔

Short Link: https://urdu.app.com.pk/urdu/?p=590621