اسلام آباد۔15مارچ (اے پی پی):امریکی کمیشن برائے بین الاقوامی مذہبی آزادی (یو ایس سی آئی آر ایف) نے کہا ہے کہ 2021 کے دوران بھارت میں مذہبی آزادی نمایاں طور پر خراب رہی کیونکہ بھارت کی 28 ریاستوں میں سے تقریبا ایک تہائی نے انسانی حقوق کے عالمی معاہدوں کی خلاف ورزی کرتے ہوئے مذہبی تبدیلی کو محدود یا ممنوع قرار دیا ہے،2021 میں بھارت میں مذہبی آزادی کے حالات نمایاں طور پر خراب ہوئے ، بھارتی حکومت نے ہندو قوم پرست ایجنڈے کو فروغ دینے سمیت اپنی پالیسیوں کی ترویج اور نفاذ میں اضافہ کیا جس سے مسلمانوں، عیسائیوں، سکھوں، دلتوں اور دیگر مذہبی اقلیتوں پر منفی اثر ات پڑے۔یو ایس سی آئی آر ایف کے مطابق امریکی حکومت نے بین الاقوامی مذہبی آزادی ایکٹ 1998 کے ذریعہ کمیشن تشکیل دیا۔
رپورٹ میں کہا گیا ہے کہ بھارتی حکومت مذہبی اقلیتوں کے خلاف موجودہ اور نئے قوانین کے ذریعہ قومی اور ریاستی دونوں سطحوں پر ہندو ریاست کے اپنے نظریاتی وژن کو منظم کررہی ہے، رپورٹ میں واضح کیا گیا ہے کہ بھارت کی 12 ریاستوں میں مذہب تبدیلی کے خلاف نافذ کئے گئے قوانین انسانی حقوق کے عالمی اعلامیہ اور شہری اور سیاسی حقوق کے بین الاقوامی معاہدے کی خلاف ورزی ہے ۔
یو ایس سی آئی آر ایف کی رپورٹ کے مطابق مذہب تبدیلی کے خلاف قوانین نے بھارت میں مذہبی آزادی کی صورتحال کو بھی متاثر کیا ہے جو پہلے ہی بہت خراب ہے، اس طرح کے قوانین اقلیتوں کے خلاف حکومت کی جانب سے ہراساں کرنے، تشدد اورامتیازی سلوک کے حامل ہیں جوسول سوسائٹی کی تنظیموں کے خلاف کریک ڈاؤن کی حوصلہ افزائی کرتے ہیں۔رپورٹ کے مطابق ریاستی سطح پر تبدیلی مذہب کے خلاف قانون سازی کا مقصد اسلام اور عیسائت جیسے مذاہب میں شمولیت کو روکنا تھا اور یہ قوانین جبری مذہبی تبدیلیوں سے تحفظ کے لئے نہیں تھے ،اس میں کہا گیا ہے کہ کچھ ریاستوں میں مذہب یا عقیدے کو اختیار کرنے کی کسی فرد کی آزادی کو زبردستی نقصان پہنچانے کے لیے مذہب کی تبدیلی پر اعتراض کے لیے ایک ضلعی مجسٹریٹ کی جانب سے عوامی کا ل درکارہے۔
نئے قوانین کے تحت گجرات، ہریانہ، ہماچل پردیش، کرناٹک، مدھیہ پردیش، اترکھنڈ، اور اتر پردیش میں مذہب تبدیل کرنے والے افراد کو اپنی بے گناہی ثابت کرنا ضروری ہے ، جو عالمی قوانین یوڈی ایچ آر اور آئی سی سی پی آردونوں کی خلاف ورزی ہے ۔رپورٹ میں کہا گیا ہے کہ حکومتی کارروائی، جس میں غیر ہندوؤں کے خلاف تبدیلی مذہب کے خلاف قوانین کا مسلسل نفاذ بھی شامل ہے، نے ہجوم اور چوکس گروہوں کی طرف سے دھمکیوں اور تشدد کی ملک گیر مہموں کے لیے استثنیٰ کا کلچر پیدا کیا ہے، بشمول مسلمانوں اور عیسائیوں کے خلاف جن پر تبدیلی کی سرگرمیوں کا الزام ہے۔
اپنی رپورٹ میں، کمیشن نے مذہبی آزادی کی سنگین خلاف ورزیوں کے ذمہ دار افراد اور اداروں پر ان افراد یا اداروں کے اثاثے منجمد کرنے اور/یا ان کے امریکہ میں داخلے پر پابندی لگا کر پابندیاں عائد کرنے کا مطالبہ کیا۔ بھارت کے ریاستی سطح کے مذہب مخالف قوانین کی خصوصیات میں مذہبی تبدیلی پر پابندیاں، نوٹس دینے کی دفعات شامل ہیں ۔ رپورٹ میں مزید کہا گیا ہے کہ یہ بین الاقوامی انسانی حقوق کے قانون کے مذہب یا عقیدے کی آزادی کے تحفظ سے مطابقت نہیں رکھتیں ۔
کمیشن نے کہا کہ مذہب یا عقیدے کی آزادی کے حق اور ملک کی مذہبی آزادی کے حالات کو مزید بگڑنے سے روکنے میں مدد کے لیے انسانی حقوق کے بین الاقوامی قانون کی تعمیل کرنے کے لیے بھارت کے ریاستی سطح پر تبدیلی مذہب مخالف قوانین کو منسوخ کرنا ضروری ہے۔
