بھارتی سکھ یاتری واہگہ بارڈر سے اپنے وطن واپس روانہ ،سردار رمیش سنگھ اروڑہ نے یاتریوں کو رخصت کیا

لاہور۔19اپریل (اے پی پی):بھارت سے آنے والے سکھ یاتری اپنی مذہبی روسومات کی ادائیگی کے بعد واپس اپنے وطن لوٹ گئے۔سکھ یاتری واہگہ بارڈر سے بھارت روانہ ہوئے۔صوبائی وزیر اقلیتی امور رمیش سنگھ اروڑہ نے 5803 بھارتی یاتریوں کو رخصت کیا۔ اس موقع پرا یڈیشنل سیکرٹری شرائنز سیف اللہ کھوکھر اورممبران پاکستان سکھ گورودوارہ پربندھک کمیٹی بھی موجود تھے۔

صوبائی وزیر اقلیتی نے اس موقع پر گفتگو کرتے ہوئے کہا کہ دعاگو ہیں کہ بہت جلد آپ لوگ واپس آئیں اور ہم مل کر محبتیں بانٹیں ،ہم نے خدمت میں کوئی کمی نہی چھوڑ ی،کوشش ہے کہ اگلی مرتبہ ویزوں کی تعداد کو مزید بڑھایا جائے گا ۔

ایڈیشنل سیکرٹری شرائنز سیف اللہ کھوکھر نے کہا کہ ہم نے کوشش کی کہ ایک بہترین ٹیم ورک کے ساتھ تمام مراحل ادا کئے جائیں ،جو کمی یا کوتاہی رہ گئی اسے اگلی مرتبہ پورا کر دیں گے،امید ہے ہم آپ کی مہمان نوازی میں پورے اترے ہوں گے۔دہلی گورودوراہ مینجمنٹ کمیٹی کے جتھہ لیڈر سردار دلجیت سنگھ نے اس موقع پر گفتگو کرتے ہوئے کہا کہ حکومت پاکستان ، حکومت پنجاب اور متروکہ وقف املاک بورڈ کے شکر گزار ہیں ،ہم نے پاکستان میں انسان اور انسانیت کی تعظیم دیکھی ہے،شرومنی گوردوراہ پربندھک کمیٹی کے جتھہ لیڈر سردار رویندر سنگھ نے کہا کہ پاکستان حقیقت میں اقلیت نواز ملک ہے،پاکستانیوں کی طرف سے ملنے والی عزت و احترام کبھی بھلا نہیں پائیں گے ۔

Short Link: https://urdu.app.com.pk/urdu/?p=584409