لاہور۔21اپریل (اے پی پی):لاہور سینٹرل پولیس آفس میں بہترین کارکردگی کا مظاہرہ کرنے والے پولیس افسران و اہلکاروں کی حوصلہ افزائی کیلئےتقریب کا انعقاد کیا گیا، ترجمان پنجاب پولیس کے مطابق پیر کوسینٹرل پولیس آفس میں منعقدہ تقریب میں آئی جی پنجاب ڈاکٹر عثمان انور نے افسران و اہلکاروں کو 20 ہزار روپے فی کس کیش انعام و تعریفی اسناد سے نوازا ۔
تقریب سے خطاب میں آئی جی پنجاب نے کہا کہ افسران و اہلکاروں نے لا اینڈ آرڈر برقرار رکھنے، عوام کے جان و مال کی حفاظت کیلئے احسن طریقے سے فرائض انجام دئیے۔ انہوں نے کہا کہ خدمت خلق کے جذبے سے سرشار فرض شناس اور باہمت افسران و اہلکار پنجاب پولیس کا اصل سرمایہ ہیں۔
ڈاکٹر عثمان انور نے کہا کہ شاندار کارکردگی کے حامل افسران و اہلکاروں کی حوصلہ افزائی کا سلسلہ ہر سطح پر جاری رہے گا۔ انعامات حاصل کرنے والوں میں 3 ڈی ایس پیز، 4 انسپکٹرز، 6 سب انسپکٹرز 23 اے ایس آئیز ،24 ہیڈ کانسٹیبلز، 130 کانسٹیبلز، 10 لیڈی کانسٹیبلز شامل ہیں۔
Short Link: https://urdu.app.com.pk/urdu/?p=584850
