بیجنگ۔28ستمبر (اے پی پی):نگراں وفاقی وزیر اطلاعات و نشریات مرتضیٰ سولنگی نے کہا ہے کہ بیلٹ اینڈ روڈ انیشی ایٹو نے پاکستان سمیت ترقی پذیر ممالک کو ترقی کے نئے مواقع فراہم کئے، یہ منصوبہ پاکستان اور چین کے تعلقات کا سنہری باب ہے۔
یہ بات انہوں نے چین کے دورہ سے وطن واپسی کے موقع پر چائنہ میڈیا گروپ کی اردو سروس سے گفتگو کرتے ہوئے کہی۔ نگراں وفاقی وزیر اطلاعات نے بیلٹ اینڈ روڈ انیشی ایٹو (بی آر آئی) کی 10 ویں سالگرہ پر چین کی حکومت اور عوام کو مبارکباد دی۔ بی آر آئی کے فلیگ شپ منصوبے سی پیک کے بارے میں گفتگو کرتے ہوئے انہوں نے کہا کہ یہ منصوبہ پاکستان اور چین کے تعلقات کا سنہری باب ہے، سی پیک نے پاکستان کے توانائی، انفراسٹرکچر اور مواصلات کے شعبوں میں نمایاں سرمایہ کاری فراہم کی ہے جس سے ترقی اور روزگار کے نئے مواقع پیدا ہوئے۔
انہوں نے اس یقین کا اظہار کیا ہے کہ پاکستان اور چین کے درمیان تعلقات مزید مستحکم ہوں گے۔ انہوں نے کہا کہ پاکستان سی پیک کے ایک نئے دور میں داخل ہو رہا ہے جس میں ایم ایل ون جیسے نئے منصوبے جاری ہیں۔ انہوں نے کہا کہ یہ منصوبے پاکستان کی ریل سروس میں سنگ میل ثابت ہوں گے اور روزگار اور ترقی کے نئے مواقع متعارف کرائیں گے۔ نگراں وفاقی وزیر نے اس یقین کا اظہار کیا کہ اکتوبر میں پاکستان کی اعلیٰ قیادت کا آئندہ دورہ چین دونوں ممالک کے درمیان تعلقات میں ایک نئے دور کا آغاز کرے گا۔ انہوں نے کہا کہ بدلتے ہوئے عالمی سیاسی منظر نامے کے باوجود پاک چین تعلقات ہر گزرتے وقت کے ساتھ بہتر ہو رہے ہیں۔
Short Link: https://urdu.app.com.pk/urdu/?p=395821
