سیالکوٹ۔26فروری (اے پی پی):محکمہ زراعت سیالکوٹ نے تربوز کے کاشتکاروں کو اگیتی فصل کی کاشت فوری شروع کرنے کی ہدایت کی ہے ۔یہ بات محکمہ زراعت کے ترجمان نے ایک بیان میں کہی۔انہوں نے کہا کہ کاشتکار تربوز کی اگیتی فصل کی کاشت وسط مارچ تک مکمل کر لیں تاکہ اچھی پیداوار حاصل کی جا سکے۔ ان کا کہنا تھا کہ تربوز کی کاشت کے لئے زرخیز ریتلی ایسی میرازمین جس میں پانی کے نکاس کا مناسب انتظام ہو بہترنتائج کی حامل ہوتی ہے۔
انہوں نے کہاکہ تربوز کے کاشتکار فصل کی کاشت سے قبل زمین کو اچھی طرح ہموار کرکے گوبر کی گلی سڑی کھاد 15سے 20ٹن فی ایکڑ ڈالیں اور ہل چلاکر اسے زمین میں ملادیں،زمین کو اچھی طرح تیار کرنے کے لئے مٹی پلٹنے والا ہل چلانے سمیت تین سے چار مرتبہ عام ہل چلا کر سہاگہ دیں تاکہ زمین اچھی طرح نرم و بھربھری ہو جائے۔
انہوں نے کہاکہ کاشتکار بہترفصل کے لئے اچھی روئیدگی والا ایک کلوگرام بیج فی ایکڑ استعمال کریں۔مزید رہنمائی کے لیے ماہرین زراعت یا محکمہ زراعت کے فیلڈ سٹاف سے بھی استفادہ کیا جا سکتا ہے۔
Short Link: https://urdu.app.com.pk/urdu/?p=566443
