سیالکوٹ۔7مارچ (اے پی پی):محکمہ زراعت نے جامن کے کاشتکاروں اورباغبانوں کوہدایت کی ہے کہ وہ جامن کے پودوں کی مناسب افزائش نسل کے لئے کھادوں کا متناسب استعمال کریں کیونکہ کھادوں کے موزوں اور متناسب استعمال سے جامن کے پودے کی اچھی بڑھوتری یقینی ہوسکتی ہے۔ایگری کلچر آفیسر(پلانٹ پروٹیکشن )محکمہ زراعت سیالکوٹ شعیب رسول نے ”اے پی پی“ کو بتایا کہ جامن کے چھوٹے پودوں کو گوبرکی گلی سڑی کھاد 20 سے 30کلوگرام فی پوداجبکہ بڑے پودوں کو 50سے 55کلوگرام فی پوداڈالنی چاہئیے۔
انہوں نے بتایا کہ جامن کے چھوٹے پودوں کو ایک پاؤیوریا‘ایک پاؤ ڈی اے پی‘ آدھا کلو گرام ایس اوپی کھاد فی پودابھی ڈالنی چاہئیے جبکہ بڑے پودوں میں پھل آنے سے قبل کھادکی شرح 3پاؤ یوریا‘3پاؤڈی اے پی اور 3پاؤ ایس اوپی فی پوداہوتی ہے۔انہوں نے بتایا کہ اوائل عمری میں جامن کے پودے کو زیادہ پانی کی ضرورت ہو تی ہے اس لئے 7سے 10 دن کے وقفہ سے پانی دیناچاہئیے۔
Short Link: https://urdu.app.com.pk/urdu/?p=569850
