اسلام آباد۔11ستمبر (اے پی پی):وزیر اعظم کے معاون خصوصی برائے موسمیاتی تبدیلی ملک امین اسلم نے کہا کہ جرمن حکومت نے وزیراعظم عمران خان کے سرسبز وشاداب پروگرام کے تحت شروع کیے گئے مختلف ماحولیاتی اور موسمیاتی تبدیلی سے متعلق اقدامات پر عملدرآمد کے لیے ہر قسم کی تکنیکی اور مالی مدد فراہم کرنے کا عزم کیا ہے، جرمنی پاکستان کے ساتھ مل کر ماحولیاتی شراکت داری کو فروغ دے رہا ہے تاکہ موسمیاتی تبدیلی اور ماحولیاتی پائیداری کے منفی اثرات کے خلاف کردارکو بڑھایا جا سکے۔
یہاں موصول ہونے والی پریس ریلیز کے مطابق برلن میں ایک تقریب میں جس میں وزیر اعظم کے معاون خصوصی ملک امین اسلم سمیت دونوں ملکوں کے اعلیٰ سطح کےعہدیدار موجود تھے ، جرمنی اور پاکستان دونوں ممالک کے درمیان موسمیاتی شراکت داری کے عمل کو شروع کرنے کے لیے ایک معاہدے پر دستخط کیے۔
آب و ہوا کی شراکت داری کا عمل حقیقت میں قومی آب و ہوا کے عمل کو مضبوط بنانا ہے جو کہ عالمی آب و ہوا کی کارروائی کے ایک حصے کے طور پر نیچر بانڈز ، کلائمیٹ فنانس اور صاف توانائی ، الیکٹرک گاڑیاں ، قابل تجدید توانائی اور پانی کے تحفظ سمیت علاقوں میں مشترکہ کام کے ذریعے کی جا رہی ہے۔
وزیر اعظم کے معاون خصوصی ملک امین نے زور دیا کہ عالمی ماحولیاتی کارروائی عالمی برادری نے 2015 کے عالمی پیرس آب و ہوا معاہدے کے تحت شروع کی تھی تاکہ گلوبل وارمنگ کے سماجی و معاشی مضر اثرات کو روکا جا سکے۔
پاکستانی سفارت خانہ میں انچارج محکمہ ماحولیاتی تبدیلی اور پروفیسر ڈاکٹر کلاڈیا وارننگ نے جرمن وفاقی وزارت برائے اقتصادی تعاون اور ترقی (بی ایم زیڈ) کی جانب سے کلائمیٹ پارٹنر شپ معاہدے کے خط پر دستخط کیے۔
جرمن عہدیدار نے دستخطی تقریب میں اپنے خطاب کے دوران اس بات پر روشنی ڈالی کہ پاکستان موسمیاتی تبدیلی کے میدان میں تعاون کے متاثر کن ٹریک ریکارڈ کی وجہ سے پاکستان ایک کلیدی ملک ہے۔
وفاقی وزارت برائے اقتصادی تعاون اور دیگر سے ملاقاتوں کے دوران پاکستان اور جرمنی کے حکام نے جاری مشترکہ ماحول اور موسمیاتی تبدیلی پر طویل پیش رفت پر تبادلہ خیال کیا-
متعلقہ منصوبوں اور پاکستان میں موسمیاتی تبدیلی کے اثرات کو کم کرنے کے لیے تعاون کو مزید مضبوط کرنے کے امکانات کو تلاش کیا۔ ملک امین اسلم نے اجلاس میں جرمن حکام کو بی ایم زیڈ کے تجویز کردہ پاکستان اور جرمنی کے مابین "آب و ہوا کی شراکت” کے اہداف اور پہلوؤں کے بارے میں آگاہ کیا اور یہ کہ کس طرح پاکستانی حکومت کی کوششوں میں مدد ملے گی کہ وہ آب و ہوا کی خرابیوں سے نمٹنے کے لیے جدید طریقہ کار کو استعمال کرے۔
موسمیاتی تبدیلی کے معاشی اثرات سے مؤثر طریقے سے نمٹنا،قابل تجدید توانائی،فطرت پر مبنی حل، نیچر پرفارمنس بانڈز اور کاربن مارکیٹس سے متعلق اقدامات شامل ہیں۔ملک امین اسلم نے امید ظاہر کی کہ یہ شراکت داری مثالی ثابت ہوگی اور عالمی برادری کو ماحولیاتی نظام اور عام آب وہوا کے چیلنجوں سے نمٹنے اور بحالی میں ایک ماڈل فراہم کرے گی۔
انہوں نے یہ بھی اعلان کیا کہ اس سال نومبر میں گلاسگو میں ہونے والی آئندہ کانفرنس کے دوران شراکت داری کو ایک اہم اقدام کے طور پر شروع کیا جائے گا۔ بعد ازاں وزیراعظم کے معاون خصوصی نے برلن میں گرین بانڈز اور پائیدار فنانس کے ماہر گول میز میں بطور مہمان اسپیکر شرکت کی اور وفاقی جمہوریہ جرمنی کی پائیدار فنانس کمیٹی کے نمائندوں کے ساتھ نتیجہ خیز تبادلہ خیال کیا۔
