جوڈیشل کمپلیکس پر حملہ عدالتی نظام کو یرغمال بنانے اور مرضی کے فیصلے کرانے کی سازش ہے، وفاقی وزیر داخلہ رانا ثناء اللہ خان

اسلام آباد۔28فروری (اے پی پی):وفاقی وزیر داخلہ رانا ثناء اللہ خان نے کہا ہے کہ جوڈیشل کمپلیکس پر حملہ عدالتی نظام کو یرغمال بنانے اور مرضی کے فیصلے کرانے کی سازش ہے، آج ایک شخص نے مسلح گروہ کے ہمراہ عدالتی نظام کو یرغمال بنانے کی کوشش کی۔ منگل کی رات اپنے بیان میں وفاقی وزیر رانا ثناء اللہ خان نے کہا کہ یہ وہی شخص ہے جس کے پاس نہ تو فارن فنڈنگ کا جواب ہے اور نہ ہی توشہ خانہ سے اربوں کی چوری کا۔انہوں نے کہا کہ جوڈیشل کمپلیکس پر حملہ کا مقدمہ درج کر دیا گیا ہے، ملوث افراد کی سی سی ٹی وی کے ذریعے شناخت کی جا رہی ہے اور عمران خان سمیت سب کو گرفتار کیا جائے گا۔

انہوں نے کہا کہ عمران خان کو ایسا کرنے کی ترغیب اس کو دی جانے والی سپیشل ٹریٹمنٹ کا نتیجہ ہے، معزز عدلیہ کو ان قانون شکنوں کے خلاف کسی قسم کی رعایت نہیں برتنی چاہیے، یہ عدلیہ کی عزت و تکریم کا معاملہ ہے اس میں کسی صورت نرمی نہ برتی جائے گی۔ انہوں نے کہا کہ قانون کا احترام نہ کرنے، غنڈہ گردی کرنے والوں کے خلاف سخت قانونی کارروائی کی جائے گی۔

Short Link: https://urdu.app.com.pk/urdu/?p=353472