جوہرآباد۔ 30 اپریل (اے پی پی):کمشنر سرگودہا ڈویژن جہانزیب اعوان نے گورنمنٹ ڈگری کالج برائے طلباء قائد آباد میں جاری انٹرمیڈیٹ امتحانات کے سلسلے میں قائم امتحانی مراکز کا دورہ کیا۔ ان کے ہمراہ ڈپٹی کمشنر فروہ عامر بھی موجود تھیں۔
کمشنر نے مختلف امتحانی ہالز کا معائنہ کرتے ہوئے طلباء کو فراہم کی جانے والی سہولیات، امتحانی عملے کی موجودگی، امتحانات کے شفاف انعقاد اور نقل کی روک تھام کے لیے کیے گئے اقدامات کا تفصیلی جائزہ لیا۔ انہوں نے امتحانی مراکز میں صفائی ستھرائی، بجلی، پنکھوں اور پینے کے صاف پانی کی دستیابی پر بھی اطمینان کا اظہار کیا۔اس موقع پر گفتگو کرتے ہوئے کمشنر نے کہا کہ امتحانات طلباء کے مستقبل کا اہم مرحلہ ہوتے ہیں، اس لیے ضلعی انتظامیہ ان کے شفاف انعقاد کے لیے ہر ممکن اقدامات کر رہی ہے۔ انہوں نے متعلقہ افسران کو ہدایت کی کہ امتحانی مراکز میں ہر سطح پر نظم و ضبط برقرار رکھا جائے اور کسی بھی قسم کی بے قاعدگی یا شکایت کی صورت میں فوری کارروائی عمل میں لائی جائے۔
ڈپٹی کمشنر فروہ عامر نے بھی انتظامات پر اطمینان کا اظہار کرتے ہوئے کہا کہ ضلع بھر میں تمام امتحانی مراکز کی مسلسل نگرانی کی جا رہی ہے تاکہ طلباء کو پرامن اور سازگار ماحول فراہم کیا جا سکے۔
Short Link: https://urdu.app.com.pk/urdu/?p=590352
