اسلام آباد۔17اکتوبر (اے پی پی): سینیٹ کی قائمہ کمیٹی برائے مذہبی امور اور بین المذاہب ہم آہنگی کا اجلاس منگل کو چیئرمین کمیٹی سینیٹر مولانا عبدالغفور حیدری کی زیرصدارت پارلیمنٹ میں ہوا۔ سینیٹرز گردیپ سنگھ، مولوی فیض محمد، پروفیسر ساجد میر، نصیب اللّہ بازئی، حافظ عبدالکریم اور حاجی ہدایت اللّہ کے علاوہ ایڈیشنل سیکریٹری مذہبی امور اور دیگر اعلیٰ حکام نے اجلاس میں شرکت کی۔
سعودی حکومت کی ہدایات کی روشنی میں حج گروپ آرگنائزرز کی تعداد 905 سے 46 تک کم کرنے کے معاملے پر کمیٹی میں تفصیلی بحث ہوئی۔حکام نے کمیٹی کو آگاہ کیا کہ قائمہ کمیٹی کی ہدایات کی روشنی میں وزارت نے سعودی عرب کی وزارت حج کو خط ارسال کیا ہے۔
خط میں سعودی وزارت حج سے درخواست کی گئی ہے کہ اس سال کیلئے حج گروپ آرگنائزرز کی تعداد کم کرنےکا فیصلہ موخر کر دے اور اس کے بعد یہ تعداد آہستہ آہستہ کم کی جائے۔اس حوالے سے ابھی سعودی وزارت حج کی طرف سے جواب کا انتظار ہے۔حج آرگنائزر ایسوسیشن آف پاکستان کے نمائندے بھی اجلاس میں شریک ہوئے۔انہوں نے گزارش کی کہ اس مسئلے پر وزارت مذہبی امور ،حج آرگنائزر ایسوسیشن آف پاکستان کے نمائندوں کو ساتھ ملا کر ڈی جی حج اور سعودی عرب وزارت حج کے حکام کے ساتھ ملاقات کرائی جائے تاکہ بروقت اس مسئلے کا حل تلاش کیا جا سکے۔
انہوں نے کہا کہ حج 2024 کیلئے جو پالیسی بنائی گئی ہے وہ ہم سے شئیر نہیں کی گئی جس پر وزارت مذہبی امور کےحکام نے جواب دیا کہ حج آرگنائزر ایسوسیشن آف پاکستان سے ملاقاتیں ہوتی رہتی ہیں، نیز حج پالیسی 2024 بھی ان کے ساتھ شئیر کی گئی ہے، شاید کمیونیکیشن گیپ کی وجہ سے ان کو پالیسی نہ ملی ہو۔چیئرمین کمیٹی نے کہا کہ وزارت مذہبی امور ڈی جی حج سے بات کر کے سعودی وزارت حج کے ساتھ حج گروپ آرگنائزر کی تعداد کم کرنے کا معاملہ اٹھائے۔سینیٹر حافظ عبدالکریم کا کہنا تھا کہ جو خط وزارت مذہبی امور نے بھیجا ہے اس کو سفارتی چینلز کے ذریعے بھیجنا چاہئے تھا۔
حکام نے کمیٹی کو آگاہ کیا کہ امکانات بہت کم ہیں کہ سعودی وزارت حج آرگنائزرز کی تعداد کم کرنے کے حوالے سے اپنا فیصلہ تبدیل کرلے اس لئے ہمیں اپنی مکمل تیاری کرنے کی ضرورت ہے۔چیئرمین کمیٹی نے کہا کہ وزارت مذہبی امور کو اس مسئلے کے حل کیلئے اپنی کوششیں جاری رکھنی چاہئے۔وزارت یا ڈی جی حج سعودی حکام سے مسئلے پر بات کرے اور پاکستان کی تحفظات سے آگاہ کرنے کے ساتھ ساتھ ان سے اپنے فیصلے پر نظر ثانی کی درخواست کرے۔معاملے پر تفصیلی بحث کے بعد چیئرمین کمیٹی نے وزارت مذہبی امور کو ایک اور خط لکھنے کا فیصلہ کیا۔
چیئرمین کمیٹی نے تجویز دی کہ نگراں وزیر برائے مذہبی امور سعودی ہم منصب کے ساتھ ملاقات کریں اور وزارت ڈی جی حج کو پابند بنائے کہ مسئلے کے حل کیلئے کوششیں جاری رکھیں، نیز کمیٹی نے وزارت کو 15 دن میں پیش رفت رپورٹ مہیا کرنے کے احکامات جاری کئے۔
اس کے علاوہ وزارت مذہبی امور کے اعلیٰ حکام نے کمیٹی کو آگاہ کیا کہ سعودی حکام نے لاہور اور کراچی ائیرپورٹس سے روڈ ٹو مکہ منصوبہ شروع کرنے کیلئے گرین سگنل دے دیا ہے جس کیلئے ایوی ایشن ڈویژن کو تیاری شروع کرنے کے حوالے سے آگاہ کر دیا گیا ہے۔کمیٹی نے ہدایات دیں کہ پشاور اور کوئٹہ سے بھی روڈ ٹو مکہ منصوبہ شروع کرنا ضروری ہے، اس پر بھی وزارت توجہ دے۔
Short Link: https://urdu.app.com.pk/urdu/?p=402104
