اسلام آباد۔6دسمبر (اے پی پی):نگران وفاقی وزیر مذہبی انیق احمد نے کہا ہے کہ حضور اکرم ﷺکی حیات طیبہ اور تعلیمات ہمیں پرامن بقائے باہمی، صلہ رحمی اور حسن سلوک کا درس دیتی ہیں، قرآن و سنت ہی وہ راستہ ہے جو معاشرے کی تشکیل اور زندگی کو گزارنے کے اصول بتاتا ہے۔ ان خیالات کا اظہار انہوں نے بدھ کو بین الاقوامی اسلامی یونیورسٹی کے ادارہ تحقیقات اسلامی کے انٹرنیشنل سنٹر آف ایکسیلنس فار سیرة سٹڈیز کے زیراہتمام پاک سعودی حکومتوں کے مشترکہ تعاون سے سیرت، تمدنی شعور اور رواداری کے موضوع پر منعقدہ دو روزہ بین الاقوامی کانفرنس کی اختتامی تقریب سے خطاب کرتے ہوئے کیا۔
اس موقع پر بین الاقوامی اسلامی یونیورسٹی کے صدر ڈاکٹر ھذال حمود العتیبی کو حکومت قزاخستان کی جانب سے ان کی خدمات کے اعتراف میں قزاخستان کے قومی ایوارڈ سے نوازا گیا جو کہ بین الاقوامی اسلامی یونیورسٹی میں سیرت النبی ﷺ کے موضوع پر منعقدہ دو روزہ بین الاقوامی کانفرنس کی اختتامی تقریب میں قزاخستان کے سفیر یرزہان کستافن اورقزاخستان کے ادارہ براے بین العقائد و بین الثقافتی مکالمہ کے سربراہ ڈاکٹر بلت سرسنابایوف نے صدر قزاخستان کی جانب سے ڈاکٹر ھذال حمود العتیبی کو عطا کیا۔ تقریب کی صدارت وفاقی وزیر مذہبی امور و بین العقائد ہم آہنگی انیق احمد نے کی۔
تقریب سے خطاب کرتے ہوئے نگران وفاقی وزیر مذہبی امور انیق احمد نے کہا کہ آپ ﷺ کی حیات طیبہ اور تعلیمات ہمیں پرامن بقائے باہمی، صلہ رحمی اور حسن سلوک کا درس دیتی ہیں۔ انیق احمد نے کہا کہ قرآن و سنت ہی وہ راستہ ہے جو معاشرے کی تشکیل اور زندگی کو گزارنے کے اصول بتاتا ہے۔ نوجوانوں کو مخاطب کرتے ہوئے انہوں نے کہا کہ نبی کریم ﷺ کی ذات ان کے لئے بہترین رول ماڈل ہے، وہ دین سے رشتہ جوڑیں کہ یہی دنیا اور آخرت کی بھلائی کی راہ دکھلاتا ہے۔ انہوں نے مزید کہا کہ نوجوان پاکستان کے روشن مستقبل کی ضمانت ہیں۔ انہوں نے اس موقع پرکانفرنس کی مناسبت سے ترتیب دی گئی سیرت النبی ﷺ نمائش کا بھی دورہ کیا اور وہاں موجود نایاب کتب اور مخطوطات میں خصوصی دلچسپی لی۔ نگران وفاقی وزیر مذہبی امور نے کہا کہ بین الاقوامی اسلامی یونیورسٹی سیرت النبی ﷺ جیسے اہم موضوعات پر کانفرنسز کا انعقاد کرکے معاشرے کی بھرپور خدمت کر رہی ہے۔
اس دو روزہ کانفرنس میں قومی اور بین الاقوامی شہرت کے حامل مقررین نے 100 سے زائد تحقیقی مقالے پیش کئے۔ کانفرنس سےقزاخستان کے ادارہ براے بین العقائد و بین الثقافتی مکالمہ کے سربراہ ڈاکٹر بلت سرسنابایوف نے خطاب میں اسلام کے اسلوب معاشرت اور انسانیت سے محبت کے پیغام اور سیرت النبیﷺ کے مختلف پہلوؤں پر روشنی ڈالی۔ کانفرنس سے خطاب کرتے ہوئے بین الاقوامی اسلامی یونیورسٹی کے صدر ڈاکٹر ھذال حمود العتیبی نے کہا کہ سیرت رسول ﷺ پرامن معاشرے کے قیام کا درس دیتی ہے جبکہ صلح رحمی اور حسن سلوک اس کے نمایاں خواص ہیں۔ان کا کہنا تھا کہ نبی کریم ﷺ نے جنگ کے حالات میں بھی بے گناہ انسانی جانوں کے ضیاع، گھروں اور فصلوں تک کو نقصان پہنچانے سے منع فرمایا اور ثابت کیا کہ ان کی ذات واقعی کل جہانوں کے لئے رحمت ہے۔
ان کا کہنا تھا کہ حیات طیبہ کی روشنی میں آج اس امر کی ضرورت ہے کہ معاشروں کو رواداری، پرامن بقائے باہمی، دینی و شخصی آزادی اور عفو درگزر کے اصولوں کی روشنی میں تشکیل دیا جائے۔اس موقع پر کانفرنس کے منتظم اعلیٰ اور ادارہ تحقیقات اسلامی کے سربراہ ڈاکٹر ضیاء الحق نے کانفرنس کے مقاصد، اہداف اور سفارشات سے آگاہ کیا اور مہمانوں کا شکریہ ادا کیا۔شرکاء کانفرنس نے اپنی سفارشات میں اس بات پر اتفاق کیا کہ سیرت النبی ﷺ کی روشنی میں معاشرتی احساس اور رواداری پر توجہ مرکوز کرتے ہوئے کانفرنسوں، سیمینارز، تربیتی ورکشاپس، تحقیقی منصوبوں اور اسی طرح کی علمی سرگرمیوں کے لئے باقاعدہ لائحہ عمل تیار کیا جائے اور اس ضمن میں ایک مستقل تنظیم بھی تشکیل دی جائے۔
Short Link: https://urdu.app.com.pk/urdu/?p=417427
