اسلام آباد۔23مئی (اے پی پی):وزیراعظم کے خصوصی معاون ہارون اختر خان نے کہا ہے کہ حکومت اور وزارت صنعت و پیداوار کاروباری برادری کے مسائل کے حل کے لیے کوشاں ہے۔ ان خیالات کا اظہار ہارون اختر خان نے پاکستان وناسپتی مینوفیکچررز ایسوسی ایشن کے ساتھ اعلیٰ سطحی ملاقات کے دوران کیا۔ وزارت صنعت و پیداوار کی جانب سے جمعہ کو جاری اعلامیہ کے مطابق وزیراعظم کے خصوصی معاون ہارون اختر خان سے پاکستان وناسپتی مینوفیکچررز ایسوسی ایشن (پی وی ایم اے ) کے وفد نے ملاقات کی ہے۔
ملاقات میں پی وی ایم اے کے چیئرمین شیخ عمر ریحان، وزارت صنعت و پیداوار کے سیکرٹری سیف انجم اور گھی انڈسٹری کے نمائندے بھی موجود تھے۔اس موقع پر گھی کی صنعت کو درپیش چیلنجز پر تفصیلی تبادلہ خیال کیا گیا۔ہارون اختر خان نے صنعت کی جانب سے اٹھائے گئے مسائل کو تسلیم کرتے ہوئے حکومت کی مکمل حمایت کی یقین دہانی کراتے ہوئے کہا کہ صنعت پر اضافی دباؤ نہیں ڈالیں گے ۔ انہوں نے مزید کہا کہ تمام بقایاجات جلد از جلد ادا کیے جائیں گے۔
انہوں نے کہا کہ وزیراعظم شہباز شریف کی حکومت تمام زیر التوا ادائیگیوں کی بروقت ادائیگی کو یقینی بنائے گی ۔ نقد ادائیگیوں میں وقت لگنے کا اعتراف کرتے ہوئے انہوں نے کہا کہ ادائیگی کے عمل کو تیز کیا جائے گا۔ہارون اختر خان نے کم آمدنی والے خاندانوں کی مدد کے لیے حکومت کی حالیہ کوششوں کو بھی اجاگر کیا اور کہا کہ وزیراعظم شہباز شریف نے رمضان پیکج مستحقین کے گھروں تک کامیابی سے پہنچایا۔
انہوں نے وزارت صنعت و پیداوار کی صنعت کے مسائل حل کرنے کے لیے مکمل وابستگی کا اعادہ کیا اور کہا کہ حکومت اور وزارت صنعت و پیداوار ہمیشہ آپ کے مسائل کے حل کے لیے موجود ہیں۔ہارون اختر خان نے کہا کہ وزیراعظم شہباز شریف کاروباری برادری کی سہولت کے لیے ہر ممکن اقدامات کرنے کے لیے پرعزم ہیں ۔
Short Link: https://urdu.app.com.pk/urdu/?p=600609
