کراچی۔ 24 جولائی (اے پی پی):سندھ کے سینئر وزیر برائے اطلاعات، ٹرانسپورٹ و ماس ٹرانزٹ شرجیل انعام میمن سے آل پاکستان نیوز پیپرز سوسائٹی کے دو رکنی وفد نے کراچی میں ملاقات کی اورانہیں اخباری صنعت کو درپیش مسائل سے آگاہ کیا ۔جمعرات کو جاری اعلامیہ کے مطابق ملاقات میں وفد نے پرنٹ میڈیا کے حجم میں اضافے، علاقائی و لسانی پریس کی اہمیت پر زور دیا۔ اس موقع پر سندھ کے سینئر وزیر شرجیل انعام میمن نے کہا کہ
سندھ حکومت آزادی صحافت اور اخبارات کے کردار کی معترف ہے، پرنٹ میڈیا معاشرے میں شعور اجاگر کرنے اور جعلی خبروں کے خلاف عوام کو درست معلومات فراہم کرنے میں کلیدی حیثیت رکھتا ہے۔ انہوں نے کہا کہ حکومت سندھ اخباری صنعت کے تمام جائز مسائل کو ترجیحی بنیادوں پر حل کرے گی اورمتعلقہ محکموں کو ہدایات جاری کی جائیں گی۔وفد میں اے پی این ایس کے صدر سینیٹر سرمد علی اور سیکریٹری جنرل محمد اطہر قاضی شامل تھے۔
