منسک۔11اپریل (اے پی پی):وزیر تجارت جام کمال نے کہا ہے موجودہ حکومت ملک میں سرمایہ کاری کے فروغ اور کاروباری افراد کی سہولت کے موثر اقدامات اٹھا رہی ہے،دنیا پاکستان میں سرمایہ کاری کی طرف راغب ہو رہی ہے، پالیسی ریٹ، بجلی کےنرخوں میں کمی، مہنگائی میں کمی سمیت معاشی اشاریے مثبت سمت میں گامزن ہیں ، آج پوری دنیا ہماری اس کامیابی کو تسلیم کر رہی ہے،وزیراعظم اور ان کی ٹیم نے گزشتہ سال کے دوران درپیش چیلنجز کا جس طرح سامنا کیا ہے ماضی میں اس کی مثال نہیں ملتی۔
وزیراعظم کے دورہ بیلاروس کے حوالے سے جمعہ کو یہاں گفتگو کرتے ہوئے انہوں نے کہا کہ چند ماہ قبل بیلاروس کے صدر پاکستان کے دورے پر آئے تھے، دونوں ممالک کے درمیان جے ایم سیز اور کاروباری سطح پر اجلاس ہوئے ، اب وزیراعظم پاکستان بیلاروس کے دورہ پر آئے ہیں، اس کا مقصد مختلف ممالک میں دستیاب مواقع سے استفادہ کرنا ہے ۔آج یہاں پاکستان کے 100 لوگ بی ٹو بی کے شعبے میں آئے ہیں اور یہاں دستیاب مواقع کو تلاش کر رہے ہیں ۔ وزیراعظم شہباز شریف اس حوالے سے اپنی ذاتی کوششیں کر رہے ہیں۔
انہوں نے کہا کہ وزیراعظم بیرون ممالک دوروں پر اپنے ساتھ کاروباری وفود لے کر جارہے ہیں، وزیراعظم کے ساتھ جانے والی بزنس کمیونٹی کو ریگولیٹرز،اعلی حکام اور وزراء کے ساتھ روابط استوار کرنے کا موقع ملتا ہے، یہ پہلی مرتبہ پاکستان میں ہو رہا ہے۔ ماضی میں چند پسندیدہ لوگ ساتھ جاتے تھے، وفاقی وزیر نے کہا کہ اس بار مختلف شعبوں سے سو سے زائد کاروباری افراد یہاں موجود ہیں۔
انہوں نے کہا کہ وزیر اعظم گزشتہ ایک سال میں جس جس ملک گئے ہیں وہ اپنے ساتھ کاروباری وفود بھی لے کر گئے، جہاں کامیاب بی ٹو بی میٹنگز ہوئیں ، اصل کامیابی یہی ہے، وزیراعظم پہلے دن سے یہی کہہ رہے ہیں اور آج دنیا اس جانب مائل ہو رہی ہے کہ ٹیرف کے جو چیلنجز درپیش ہیں ، اس کو بزنس کمیونٹی ہی حل کرے گی۔ ہم اپنی بزنس کمیونٹی کی معاونت اور اسے مضبوط کر رہے ہیں، پاکستان میں بہت سے چیلنجز ہیں لیکن وزیراعظم اور ان کی ٹیم نے گزشتہ سال کے دوران ان چیلنجز کا جس طرح سامنا کیا ہے ماضی میں اس کی مثال نہیں ملتی۔
ان شاء اللہ ہر گزرتا دن مزید بہتر ہو رہا ہے، پالیسی ریٹ، بجلی ریٹ، مہنگائی میں کمی اور مجموعی طور پر کرنسی کی بحالی سمیت باقی چیزوں میں بھی بہتری نظر آرہی ہے۔آج پوری دنیا ہماری اس کامیابی کو تسلیم کر رہی ہے۔ انہوں نے کہا کہ پاکستان میں کامیاب منرلز کانفرنس منعقد ہوئی جس میں امریکا ، سعودی عرب، ترکیہ سمیت مختلف ممالک سے سرمایہ کار اور کاروباری افراد آئے انہوں نےکہاکہ جو اقدامات کئے جارہے ہیں اور جو چیلنجز ہیں ان کا سامنا کر رہے ہیں اور معاملات بہتری کی طرف جائیں گے۔
Short Link: https://urdu.app.com.pk/urdu/?p=580564
