اسلام آباد۔10جون (اے پی پی):حکومت نے آئندہ مالی سال 26-2025کے بجٹ میں سرکاری شعبہ کے ترقیاتی پروگرام(پی ایس ڈی پی ) کے تحت داخلہ ڈویژن کی 3 نئی اور 15 جاری منصوبوں کیلئے مجموعی طور پر 12ارب 90 کروڑ 84 لاکھ 44ہزار روپے کے فنڈز مختص کئے ہیں ۔ منگل کو جاری ہونے والے پی ایس ڈی پی کے اعدادوشمار کے مطابق حکومت نے آئندہ مالی سال کے بجٹ میں داخلہ ڈویژن کی 3 سکیمیں شامل کیں ہیں ،جن میں سیف سٹی اسلام آباد کی توسیع کیلئے 3 ارب روپے ، اسلام آباد انفراسٹرکچر کیلئے 2 ارب روپے ، این ایف اے کیلئے کنورشنل فرانزک سہولیات کی بین الاقوامی معیار کے مطابق تعمیر کے مقصد کیلئے 10 کروڑ روپے مختص کئے ہیں ۔
پی ایس ڈی پی میں 15 جاری منصوبوں کیلئے مجموعی طور پر 78ارب 84 کروڑ 44 لاکھ روپے مختص کئے ہیں ۔ 15جاری منصوبوں میں اسلام آباد سیکٹر ایچ 16 میں ماڈل جیل کی تعمیر کے منصوبے کیلئے ایک ارب 18 کروڑ 9 لاکھ 51ہزار روپے مختص کئے گئے ۔جس پر لاگت کا تخمینہ 7 ارب 49 کروڑ 90لاکھ روپے لگایا گیا ہے اور اب تک اس منصوبے پر 3 ارب 59 کروڑ 13 لاکھ روپے سے زائد خرچ کئے جا چکے ہیں۔ دیگر جاری سکیموں میں صوبہ سندھ میں 13 ریجنل پاسپورٹ دفاتر کی تعمیر ، اسلام آباد پولیس کیلئے چینج منیجمنٹ یونٹ کے کیمپ کا قیام ، مربوط باڈر منیجمنٹ سسٹم فیز 2 کی تعمیر ، نیو اسلام آباد انٹر نیشنل ایئر پورٹ پر قائم میٹرو بس سٹیشن کے پیشہ وارانہ امور و مرمت کا منصوبہ ،پاسپورٹ ایپلیکشن کیلئے بائیومیٹرک تصدیق کی اپ گرڈیشن ، غیر ملکی شہریوں کی سیکورٹی اور متعلقہ سہولیات کی فراہمی ،نیشنل پولیس ہسپتال کی تعمیر ، اسلام آباد کے دیہی علاقوں کیلئے بارش کے پانی کے کاشتکاری کے مقاصد کیلئے استعمال منصوبہ ، سیوریج ٹریٹ منٹ پلانٹس کی تعمیر کے تین منصوبے ، اسلام آباد ڈویلپمنٹ پیکج ، لینڈ ریونیو اسلام آباد رولرز فیز 2 کے انتظامی نظام ، نشے کے عادی افراد کی بحالی کے ماڈل مرکز کا قیام ، نادرا کے تیسرےمرحلے کے ڈیجیٹل اکانومی توسیع منصوبہ شامل ہیں ۔ان تمام جاری منصوبوں کیلئے لاگت کا تخمینہ 40 ارب 73 کروڑ 61 لاکھ 82 ہزار روپے لگایا گیا ، جن میں سے اب تک 14 ارب 54 کروڑ 51 لاکھ روپے خرچ کئے جا چکےہیں ۔
