پشاور۔ 21 اپریل (اے پی پی):خیبرمیڈیکل یونیورسٹی (کے ایم یو) میں ورلڈ ٹی بی ڈے کی مناسبت سے تقریب کا انعقاد کیا گیا جس میں صوبائی مشیر صحت احتشام علی، عالمی اداروں کے نمائندوں نے شرکت کی۔ اس موقع پر مشیر صحت احتشام نے ٹی بی موبائل وین کلینکس کا افتتاح کیا جبکہ پروجیکٹ ڈائریکٹر ٹی بی کنٹرول پروگرام ڈاکٹر مدثر شہزاد نے پروگرام بارے تفصیلی بریفنگ دی۔بریفنگ کے دوران بتایا گیا کہ پاکستان دنیا کا پانچواں ملک ہے جہاں ٹی بی کا پھیلائو دیگر ممالک کی نسبت زیادہ ہے، پاکستان میں ہر ایک لاکھ میں سے 277 افراد ٹی بی کا شکار ہوتے ہیں۔اس موقع پر دی جانیوالی بریفنگ کے دوران مزید بتایا گیا کہ ہمارے ملک میں ہر سال چھ سے سات لاکھ لوگ ٹی بی کا شکار ہوتے ہیں۔ گزشتہ سال میں 4 لاکھ 70 ہزار سے زیادہ ٹی بی کیسز ملک بھر سے رپورٹ ہوئے ہیں۔
ورلڈ ٹی بی ڈے کی مناسبت سے خیبرمیڈیکل یونیورسٹی میں تقریب سے خطاب کرتے ہوئے ڈاکٹر مدثر شہزاد نے بتایا کہ صوبہ میں سالانہ ایک لاکھ سے زیادہ مریض ٹی بی کا شکار ہوتے ہیں۔ ان مریضوں میں 50 سے 60 ہزار ٹی بی کنٹرول پروگرام کیساتھ رجسٹر ہوتے ہیں۔مشیر صحت احتشام علی کا اس موقع پر کہنا تھا کہ ہم نے آج عہد کرنا ہے کہ ٹی بی کو شکست دینی ہے، ٹی بی کنٹرول پروگرام نے اپنی استعداد میں اضافہ کرکے صوبہ بھر میں اپنا نیٹ ورک پھیلا دیا ہے۔انہوں نے کہا کہ اس نیٹ ورک کی بدولت ٹی بی کیسز کی رپورٹنگ بہتر ہوئی، اس نیٹ ورک سے ٹی بی کے خفیہ پھیلاو کا روستہ روکا گیا ہے۔
اس پروگرام کے تحت اب تک 8 لاکھ سے زائد ٹی بی مریضوں کا مفت علاج کیا ہے۔ مشیر صحت کا کہنا تھا کہ ٹی بی کنٹرول پروگرام کے تحت ڈرگ رزسٹنٹ ٹی بی کی شرح کو کم کرنے کیلئے انٹرونشنز کی جارہی ہے۔ سالانہ 2100 افراد ڈرگ رزسٹنٹ ٹی بی کا شکار ہوتے ہیں۔انہوں نے کہا کہ اس پروگرام کے ذریعے 4 ہزارمزاحمتی ٹی بی مریضوں کا مفت علاج کیا گیا ہے، مزاحمتی ٹی بی کا علاج طویل المدتی اوراس کے اخراجات عام ٹی بی سے زیادہ ہیں۔ 18 ماہ تک طویل مزاحمتی ٹی بی کے ایک مریض کے علاج پر دس لاکھ روپے تک خرچہ آتا ہے۔
احتشام علی کے مطابق ٹی بی کے تمام مراکز میں اب ٹی بی کیساتھ ساتھ ایچ آئی وی کی تشخیص بھی ہوتی ہے، ڈیجیٹل ایکسرے اور جین ایکسپرٹ مشینوں پر مشتمل دس موبائل وینز بھی بروئے کار لائی جارہی ہیں جبکہ صوبہ کے سرکاری ہسپتالوں میں 235 بیسک مینجمنٹ یونٹ قائم کئے ہیں، ان یونٹس میں ٹی بی کی مفت تشخیص، علاج، مشاورت اور آگاہی فراہم کیجاتی ہے ۔
Short Link: https://urdu.app.com.pk/urdu/?p=585210
