پشاور۔ 29 اکتوبر (اے پی پی):خیبرپختونخوا کے میدانی علاقوں میں بارش جبکہ پہاڑوں پر برفباری کا سلسلہ شروع ہو گیا ہے۔محکمہ موسمیات کے پی کے کے مطابق مانسہرہ اور گردنواح میں گرج چمک کے ساتھ موسلا دھار بارش سے موسم مزید سرد ہو گیا۔ اس کے علاوہ بالاکوٹ، اوگی، بفہ اور شنکیاری میں شدید بارش ہوئی ۔موسم سرما شروع ہوتے ہی میدانی علاقوں میں بارش اور پہاڑوں پر برفباری شروع ہو گئی ہے۔
وادی ناران، کاغان، بابو سر ٹاپ پر برف باری کا سلسلہ جاری ہے۔ ناران کے سیاحتی مقامات پر رات گئے سے شدید برف باری کا سلسلہ جاری ہے، اور تاحال ناران میں ایک انچ جبکہ بٹہ کنڈی میں 4 انچ تک برفباری ریکارڈ کی گئی ہے۔اس کے علاوہ بلند ترین سیاحتی مقام بابو سر ٹاپ پر ایک فٹ سے زائد برف پڑ چکی ہے، اور اس کے باوجود بھی بابوسر ٹاپ پر شدید برفباری کا سلسلہ جاری ہے، جس کے باعث شاہراہ بابوسرٹاپ ہر قسم کی ٹریفک کے لیے بند کر دی گئِی ہے۔
ترجمان ٹورازم کے مطابق یہ وادی ناران کے سیاحتی مقام بٹہ کنڈی میں پہلی برف باری ہے، اس سے کچھ روز قبل بابوسر ٹاپ پر بھی برف باری ہوئی تھی، ذرائع نے بتایا کہ محکمہ سیاحت کی ہیلپ لائن 1422 چوبیس گھنٹے فعال ہے، سیاح سفر سے قبل ہر قسم کی معلومات ہیلپ لائن سے لے سکتے ہیں۔
